18 may tarixində Mingəçevir STEAM Mərkəzində Women In Tech Azərbaycan nümayəndəliyi ilə İsveç İnstitutu və İsveç Səfirliyinin əməkdaşlığı çərçivəsində və “STEAM Azerbaijan” mərkəzinin dəstəyi ilə Tekla festivalı təşkil olundu.Tədbirin əsas məqsədi 11-15 yaşlı qızların texnologiya sahəsinə təşfiq etmək idi. Tekla festivalı qızların müxtəlif mövzularla məşğul ola bilmələri və texnologiya sahəsində özlərinə inamını artıra bilmələri üçün şən əhval-ruhiyyəli və yaradıcı bir mühiti təmin edir.
Tədbir 3 hissədən ibarət idi:
- Tərəfdaşlar tərəfindən qızlar üçün “micro bit” ilə vurma cədvəli və addım ölçmə ustad dərsləri;
- STEAM və texnologiya sahəsinin mütəxəssislərinin iştirakı ilə “Uğurlu və xoşbəxt qızları necə böyütmək olar?” mövzusunda panel müzakirəsi;
- İsveçdən dəvət olunmuş xüsusi qonaq Hakimə Şirəlizadənin nitqi.
Festival Azərbaycandakı İsveç Krallığının fövqəladə və səlahiyyətli səfiri Tobias Lorentzsonun salamlama nitqi ilə açıldı.
Səfirdən sonra D. Nağıyev adına 9 nömrəli tam orta məktəbin direktoru Fərqanə Niyazova və Women In Tech Azərbaycan nümayəndəliyinin tərəfdaşı Leyla Hacıyeva giriş nitqi ilə çıxış edərək tədbirdə iştirak edən Mingəçevirli gənc qızları, onların valideynlərini və eyni zamanda Bakıdan gələn qonaqları salamladı.
Women In Tech Azərbaycan nümayəndəliyinin tərəfdaşı Leyla Hacıyevının moderatorluğu və “Start IT” şirkətinin direktoru Azər Sanılının, “Azərbaycan-Gürcüstan-Türkiyə Mühəndislik” meneceri Nigar Cəlilovanın, Dördüncü Sənaye İnqilabının Təhlili və Koordinasiya Mərkəzinin Rəqəmsal İqtisadiyyat şöbəsinin rəhbəri Xəyalə Fətullayevanın, “Maestro School” kursların təsisçisi Mədinə Paşayevanın iştirakı ilə valideynlər üçün panel müzakirəsi keçirildi. Müzakirə zamanı isə qızlar yuxarıda qeyd olunan ustad dərslərinə qatıldılar.
Tədbirin 3-cü hissəsində İsveçdən dəvət olunan həmyerlimiz “Erikson” şirkətinin icma rəhbəri Hakimə Şirəlizadə “Tedx Talk” formatında öz uğur hekayəsi ilə qızlar və valideynlər qarşısında çıxış etdi. Çıxışından sonra festivala qoşulan qızlara səfirlik tərəfindən İsveç uşaq yazıçısı Astrid Lindqrenin “Uzuncorab Pippi”, “Balaca və damda yaşayan Karlson” və “Lönneberqalı Emil” və diplomlar təqdim edildi. Növbəti Tekla Festivalı 2025-ci ildə keçiriləcək.
