NASA tədqiqatçıları ekipajlı kosmik gəmisinin Marsa və ya Qırmızı Planetə enişini simulyasiya etmək üçün dünyanın ən sürətli superkompüteri olan Frontier-dən istifadə edib. Qeyd edək ki, NASA 1976-cı ildə Viking layihəsi ilə ilk yerüstü missiyasından bəri Marsa doqquz robotu uğurla endirsə də, insanların Marsa təhlükəsiz şəkildə çatdırılması tamamilə yeni yanaşmalar və texnologiyalar tələb edir. Ancaq bu texnologiyaları və sistemləri əvvəlcədən Yer üzündə geniş şəkildə sınaqdan keçirmək mümkün deyil, çünki eyni şərtləri hazırlamaq demək olar ki, mümkün deyil.
Bununla belə, NASA düşünür ki, kompüterləşdirilmiş simulyasiyalar bu testləri mümkün edə bilər. Bu məqsədlə, NASA dünyanın ən sürətli superkompüteri olan Frontier-dən istifadə edərək ekipajlı kosmik gəmisinin Marsa enişini simulyasiya edib. 2019-cu ildən bəri tədqiqatçılar Enerji Departamentinin Oak Ridge Liderlik Hesablama Təsislərindəki superkompüterlərdə ekipajlı Mars kosmik gəmisinin hesablama maye dinamikası və ya CFD simulyasiyalarını həyata keçirirlər. Əldə edilən nəticələr insanların Qırmızı Planetə təhlükəsiz şəkildə enməsi üçün bir addım olacaq.
Nasa Marsa eniş üçün istifadə edəcəyi kosmik gəmiyə paraşüt quraşdırmayacaq və bu böyük bir problem ola bilər. Bunun əvəzinə NASA insanı Marsa endirmək üçün retropulsiyadan istifadə etmək istəyir. Bu, sürəti azaltmaq üçün kosmik gəminin istilik qoruyucusuna quraşdırılmış irəliyə doğru yönəlmiş raketlərdən istifadə etməyi təklif edir. Problem ondadır ki, NASA əvvəllər heç vaxt belə bir uçuş həyata keçirməyib. “Onda paraşütdən istifadə etsinlər” fikri ağlına gələ bilər, amma bu mümkün deyil. NASA robotlaşdırılmış nəqliyyat vasitələrində paraşütlərdən istifadə etsə də, əslində insanlı gəmilərdə paraşütdən istifadə etmək fiziki olaraq mümkün deyil. Əvvəlki Marsa eniş aparatlarının çəkisi təxminən 1 ton idi. Astronavtları və bütün həyati dəstək sistemlərini daşıyan bir kosmik gəmi bundan 20-50 dəfə daha ağır olacaq. Habelə, Marsın incə atmosferi də, belə böyük bir nəqliyyat vasitəsinin paraşütlə enməsinə imkan vermir.
