Microsoft və Quantinuum, indiyə qədər ən xətasız kvant hesablama aparatını hazırladıqlarını açıqlayıb. Belə ki, texnologiya nəhəngləri virtual kubitlərdən istifadə edərək, xəta nisbətini 800 dəfə azaltmağı bacarıb. Kvant kompüterləri, IBM və Google kimi texnologiya nəhənglərinin diqqətini çəkməsinə və üzərində illərdir işlənməsinə rəğmən hələ də praktik tətbiqini tapmayıb. Ancaq bu vəziyyət tezliklə dəyişə bilər.
Microsoft və Quantinuum, kvant kompüterləri üçün çox mühib bir addım atıb. Qeyd edək ki, klassik kompüterlər məlumatı emal etmək üçün ikili bitlərdən (açıq və ya söndürülmüş) istifadə etdiyi halda, kvant kompüterləri eyni vaxtda iki vəziyyətin superpozisiyasında mövcud ola bilən kubitlərlə işləyir. Kubitlərlə bağlı ən böyük problem onların səhvə meylli olmasıdır. Buna görə də, bugünkü kvant kompüterləri yalnız təcrübələr və tədqiqatlar üçün istifadə edilə bilər.
Microsoft-un bu problemə həlli, fiziki kubitləri virtual kubitlər kimi qruplaşdırmaq oldu. Beləliklə, kubitlərə zərər vermədən diaqnostika və səhvləri düzəltmək yolu ilə Quantinuum-un aparatında işə salmaq mümkün oldu. Nəticədə, Microsoft yalnız fiziki kubitlərə əsaslanan kompüterlərdən 800 dəfə aşağı xəta nisbətinə nail ola bildi. Microsoft iddia edir ki, kompüter 14 000-dən çox təcrübəni səhvsiz keçirə bilib. Microsoft-un Strateji Missiyalar və Texnologiyalar şöbəsinin baş vitse-prezidenti Jason Zanderin sözlərinə görə, bu nailiyyət nəhayət bizi praktik tətbiqlər üçün kifayət qədər etibarlı olan “Səviyyə 2 Möhkəm” kvant hesablamalarına gətirə bilər.
