İnnovasiya və Rəqəmsal İnkişaf Agentliyinin “Technest” Təqaüd Proqramı çərçivəsində həyata keçirilən “Holberton School”un növbəti dalğası üzrə qeydiyyata start verilib.
“PAŞA Holding”in sponsorluğu ilə həyata keçirilən proqram bu ildən proqram təminatının əsasları və “Full Stack” olmaqla iki istiqamət üzrə tam ödənişsiz tədris verəcək. Proqramdan İKT sahəsində təhsil almaq istəyən 18 yaşdan yuxarı hər kəs yararlana biləcək.
Seçim prosesi onlayn formada baş tutacaq. Belə ki, müvafiq veb-saytdan qeydiyyatdan keçərək müraciət edən şəxsə 3 addımdan ibarət tapşırıqlar veriləcək. Sonuncu addımda namizədlər “Holberton”un nümayəndələri tərəfindən müsahibəyə cəlb olunacaq. Bu mərhələlərdə namizədin məntiqi və analitik düşüncə qabiliyyəti ölçüləcək və onlardan kompüter elmləri, proqramlaşdırma bilikləri tələb olunmayacaq. Eyni zamanda seçim prosesi ingilis dilində baş tutacaq ki, burada da namizədin dil biliyinin olması zəruridir.
Bu mərhələləri uğurla keçən 60 nəfər təlimlərdə iştirak hüququ əldə edəcək və tam təqaüdlü təhsil imkanı qazanacaq. Proqram müddətində dərslər əyani formada, hər gün 09:00-dan 18:00-a qədər davam edəcək. Tədris qarşılıqlı (peer-to-peer) öyrənmə üsulu ilə həyata keçirilir ki, bu yanaşma tələbələrə komanda əsaslı şəraitdə dərs keçməyə və digər tələbələrlə ünsiyyət imkanı ilə təhsil proqramını effektiv mənimsəməyə imkan yaradır.
Müraciət üçün son qeydiyyat tarixi 02.02.2024-dür.
Müraciət üçün keçid edin: http://www.holbertonschool.com/apply
Proqramla bağlı ətraflı məlumatı holbertonschool.com saytı vasitəsilə əldə edə bilərsiniz.
Xatırladaq k, İnnovasiya və Rəqəmsal İnkişaf Agentliyinin “Holberton School”la əməkdaşlığına əsasən, kompüter elmləri və proqram təminatı mühəndisliyi üzrə ixtisaslaşmış məktəblər şəbəkəsi 2023-cü ilin oktyabr ayından yeni tədris proqramına start verib. Proqram üzrə 60 nəfər kompüter elmlərinin əsasları üzrə tam ödənişsiz tədrisə cəlb olunub.
“Holberton” Məktəblər Şəbəkəsi Silikon Vadisində yüksək keyfiyyətli texnoloji proqramlarla, innovativ və praktiki metodologiya əsasında İKT sahəsində tədris verir. 2016-cı ildə yarandığı gündən bu şəbəkə 3500-dən çox tələbəni qəbul edərək 4 qitədə 33 kampusa qədər genişlənib. Məzunların əksəriyyəti LinkedIn, Google, Tesla, Apple, Docker, Cisco, IBM, Santander Bank və s. kimi beynəlxalq nüfuzlu şirkətlərdə karyera imkanı əldə ediblər.
