Almaniyanın Schleswig-Holstein əyalətində günəş panelli və inteqrasiya olunmuş batareyalı evdə ciddi partlayış olub. Açıqlamalara görə, partlayış günəş panelinin batareyasında yaranan texniki nasazlıq nəticəsində baş verib. Hadisədən sonra binaya ciddi ziyan dəydiyi və yəqin ki, söküləcəyi bildirilib.
Yerli yanğınsöndürənlərin bildirdiyinə görə, partlayışdan sonra evin xarici divarlarından biri tamamilə dağılıb və böyük dağıntı parçaları bağçaya səpələnib. Maddi ziyanın yüz minlərlə avroya çata biləcəyi bildirilsə də, hadisə zamanı ev sahibləri tətildə olduğu üçün tələfat və xəsarət alan olmayıb. İlkin araşdırmalar göstərir ki, partlayışa günəş enerjisi sisteminə qoşulmuş batareyaların saxlanma qurğusunda yaranan nasazlıq səbəb ola bilər. Səlahiyyətlilərin sözlərinə görə, günəşli hava səbəbindən batareya tam doldurulmuş ola bilər və artıq enerjini şəbəkəyə ötürə bilməyib. Bu, batareyanın həddindən artıq yüklənməsinə və partlayıcı şəkildə boşalmasına səbəb ola bilər.
Səlahiyyətlilər, onu da vurğulayırlar ki, litium-ion batareyalar texniki nasazlıqlar səbəbindən partlaya bilər, lakin belə hadisələr son dərəcə nadir hesab olunur. Partlayışın dəqiq səbəbini müəyyən etmək üçün ekspert hadisə yerində ekspertiza aparacaq. Polis ərazini mühasirəyə alıb və mərkəzi küçə nəqliyyatın hərəkəti üçün bağlanıb. Hadisə yerinə yanğınsöndürənlər, texniki yardım təşkilatları və polis qüvvələri cəlb edilərək müdaxilə edilib. Yanğın tez bir zamanda nəzarət altına alınsa da, evin hələ də uçmaq təhlükəsinin olduğu bildirilir. Habelə, günəş panelli və batareyalı bu evdə baş verən böyük partlayışın səbəbi hələ tam olaraq açıqlanmayıb. Bununla yanaşı, Almaniyada yerləşən enerji saxlama şirkəti Senec, hadisənin batareya sistemləri ilə əlaqəli olmadığını açıqlayıb.
