Artıq bir çox ölkədə alternativ enerji mənbələrindən istifadə olunur. Hətta bəzi ölkələr məsələn, Çin artıq günəş enerjisi və digər yaşıl enerji mənbələrindən istifadə edərək ölkədəki enerji təlabatının əsas hissəsini təmin edir. Türkiyəli tədqiqatçılar aşkar ediblər ki, günəş panellərini daha səmərəli etmək olar. Belə ki, Türkiyənin Abdullah Gül Universitetinin tədqiqatçıları günəş panellərinə kiçik günbəz formalı çıxıntılar əlavə etməyin 33-66% daha çox günəş şüası tutmağa imkan verdiyini iddia edib.
Ümumiyyətlə, tipik olaraq günəş panelləri istənilən vaxt işığın düşdüyü ərazini artırmaq üçün düz bir səthə malikdir. Bu dizayn günəş şüası ona müəyyən bir bucaq altında düşdükdə daha yaxşı səmərəlilik verir. Bun görə də günəş panelləri gün ərzində tez-tez müxtəlif bucaqlarda təxminən 15º-40º aralığında əyilir. Alimlər günəş panelinin səthinə çoxlu kiçik günbəzşəkilli kvars elementlərinin əlavə edilməsi ilə onun daha çox işıq şuası toplamasına və daha çox enerji istehsal etməsinə şahid olublar.
Türk alimləri günəş panellərinə günbəz formalı çıxıntılar əlavə etməyin onun səmərəliliyini necə artıra biləcəyinə dair geniş modelləşdirmə aparıblar. Tədqiqatda alüminium təbəqə və substrat üzərində aktiv təbəqə kimi üzvi polimer P3HT:ICBA istifadə edərək hazırlanmış və şəffaf indium qalay oksidi (ITO) təbəqəsi ilə qorunan fotovoltaik elementlərdən istifadə edilmişdir. Bu çoxqatlı struktur bütün günəş paneli boyunca qorunub saxlanılır. Elm adamları hələ belə günəş elementlərinin fiziki versiyalarını yaratmayıblar, lakin həqiqətən də bu qədər effektiv olduqları sübut olunarsa, onların araşdırması günəş enerjisinin inkişafına əhəmiyyətli təsir edə bilər.
