Ağıllı saatlar demək olar yavaş-yavaş hamının gündəlik istifadə etdiyi əşyaya çevrilib. Hər qiymət səviyyəsi üçün müxtəlif ölçülər, müxtəlif imkanlar vəd edən ağıllı saat tapmaq mümkündür. Lakin bədəninizə uzun müddət təmas edən ağıllı saatların keyfiyyətli olması vacibdir. Ona görə ağıllı saat alacağınız zaman tanınmış markalara yönəlməyiniz və büdcənizdən biraz keçməyiniz məsləhət görülür. Bir çox hallarda ucuz məhsullar xüsusilə ucuz material keyfiyyəti səbəbi ilə dərinizdə müxtəlif sağlamlıq problemləri yarada bilər. Amma tanınmış brend də olsa Samsung şirkətinin ağıllı saatları ilə bağlı sağlamlıq cəhətdən bəzi şikayətlər mövcuddur. Ötən gün bir reddit istifadəçisi Samsung Galaxy Watch ağıllı saatı ilə bağlı öz şikayətini paylaşıb. Belə ki, həmin şəxsin şikayətinə görə ağıllı saat həddindən artıq isindiyi üçün dərisində yanığa səbəb olub.
Problem Samsung Galaxy Watch ağıllı saatları, yoxsa istifadədən qaynaqlanır?
Bu problemə hər ikisi deyərək ən qısa cavabı verə bilərik. İlk növbədə Samsung Galaxy Watch ağıllı saatları ilə bağlı istifadəçilərdən fərqli vaxtlarda çeşidli şikayətlər paylaşılıb. Çox təəssüf ki, istifadəçilərin bildirdiyinə görə bəzi Galaxy Watch modellərində litium ion batareyanın isinməsi ilə bağlı həqiqətən də problemlər mövcuddur. Lakin problem təkcə bundan qaynaqlanmır. Samsung şirkəti bəzi ağıllı saatlarının arxasında Nikel tərkibli metaldan istifadə edir ki, uzun müddət bu metala təmas etmək bəzi insanlarda allergik reaksiyalara səbəb olur. Müxtəlif rəylərə görə isə qanda oksigen miqdarını ölçmək üçün olan sensor bəzi insanların dərisində qəribə bir qıcıqlanmaya səbəb olur.
Bu problemi ən son yaşayan MattsterOfSelf ləqəbli reddit istifadəçisinin sözlərinə görə yuxusuzluqdan əziyyət çəkdiyi üçün yuxu dərmanı içib və yuxuya nəzarət məqsədi ilə saatını taxaraq yatmağa yollanıb. Yuxu dərmanının təsiri ilə qolu bu vəziyyətə qədər gələrkən xəbəri olmayan adam ayıldıqda xoş olmayan mənzərə ilə qarşılaşıb. İddia etdiyinə görə buna səbəb ağıllı saatın həddindən artıq isinməsi olub. Həkimə yollanan MattsterOfSelf ləqəbli istifadəçinin qolu adətən, yağ təbəqəsinə qədər aşınıb və üçüncü dərəcəli yanıq diaqnozu qoyulub.
İndi isə axtardığımız ikinci sualın yəni, “istifadədən aslı olaraq belə hallar yaşana bilərmi?“sualına cavab verək. Qeyd etdiyimiz kimi Nikelə qarşı və saatdakı qayışın materialına qarşı allergiyanız varsa saatı taxdıqda müəyyən qaşınma hissiyatı və çıxardıqda qızarıqlıq görə bilərsiniz. Lakin saatın çox kip taxılması bir çox hallarda belə problemlə səbəb olur. Adi saatlardan fərqli olaraq çox vaxt daha kip taxılan ağıllı saatlar dərinin tərləməsi, havasızlıq və isti səbəbi ilə dərinin aşınmasına səbəb olur. Xüsusilə bilmədən qolunuz üzərinə yatdıqda daha da kiplənən saat rahatlıqla bu tip problemlər yarada bilər. MattsterOfSelf ləqəbli şəxs bəlkə də saatın isinməsi yox, məhz öz məsuliyyətsizliyi ucbatı ilə belə bir hal yaşayıb. Lakin minlərlə insanın da saatını taxaraq yatdığını və heç bir problemlə qarşılaşmadığını gördükdə işlər biraz qəlizləşir.
Nəticədə diqqətlər Samsung Galaxy Watch ağıllı saatı ilə bağlı olduğu ehtimal edilən texniki problemə yönəlib. Verilmiş məlumata görə hal-hazırda Galaxy Watch ağıllı saatları ilə bağlı müəyyən təhqiqat prosesi başladılıb və istifadəçilərin şikayətləri araşdırılır.
