İnternetə kompüterinizdə brauzer üzərindən tez-tez daxil olursunuzsa, böyük bir ehtimalla reklam bloklayıcılardan yararlanmısınız. Əgər heç vaxt işlətməmisinizsə qeyd etmək lazımdır ki, reklam bloklayıcı tətbiq və ya əlavələr (uzantı, extension) daxil olduğunuz saytlarda reklamların göstərilməsinin qarşısını alır. Hətta bu tip əlavələrin ən sevilən tərəfi YouTube kimi platformalarda videolar üzərində çıxan reklamların bloklanmasıdır. Eyni zamanda texniki imkanlar zəif olan, internet trafikinin çox xərclənməsini istənməyən insanlar üçün də reklam bloklayıcılar vacib əhəmiyyət kəsb etməkdədirlər. Belə ki, Federal Təhqiqat Bürosu olan FBI, internetdə baş verən saxtakarlıq əsaslı cinayətlərin, kiberhücumların böyük bir hissəsinin saytlarda göstərilən “reklamlar” ilə həyata keçirildiyini bildirib. Üstəlik, FBI tərəfindən reklam bloklayıcı əlavələrin bu mövzuda çox ciddi əhəmiyyətindən bəhs olunub.
FBI reklam bloklayıcı əlavələrdən başqa bəzi tövsiyələr verib
Qeyd edilən məlumata görə, veb-saytlarda göstərilən reklamların böyük bir hissəsi heç bir əsli olmayan saxta məzmunları özündə birləşdirir. Bu reklamlara yanlışlıqla və ya hansısa bir səbəb olmadan daxil olmaq isə bəzən şəxsi məlumatların oğurlanmasına, müəyyən kompüter viruslarının yüklənməsinə və.s gətirib çıxarır. Ona görə də FBI, reklamlara yanlışlıqla toxunmaqdansa reklam bloklayıcı əlavələrdən istifadə etməyi məsləhət görürür.
Həmçinin, FBI reklam bloklayıcı əlavələrə alternativ bəzi təhlükəsizlik tövsiyələri də edib. Məsələn, hər hansı bir sayta daxil olarkən adres bölməsini əllə yazmaq və eyni zamanda hərf, simvol fərqlərini diqqətlə yoxlamaq lazımdır. Reklam bloklayıcı əlavələri quraşdırmamış, bununla bağlı da araşdırmaları diqqətlə həyata keçirmək və güvənilən əlavələri işlətmək lazımdır. Əks halda reklamdan qorunmaq istəyərkən, zərərli əlavəni elə birbaşa brauzerinizə quraşdıra bilərsiniz. Xüsusilə “Chrome” brauzeri üçün “Chrome extensions” deyə axtarış edərək, ilk qarşınıza çıxan veb-saytdan əlavələri axtarıb quraşdırmağınız mümkündür.
