Bildiyimiz kimi, son illərdə Səudiyyət Ərəbistanının inanılmaz düz xətt şəklində olan şəhəri The Line böyük səs-küyə səbəb olmuşdu. Yeni ortaya çıxan məlumatlara görə isə, layihə ilk mərhələdə nəzərdə tutulduğundan qat-qat daha kiçik olacaq. Ümumiyyətlə 170 km uzunluğunda olan bu layihə barədə nə bilirsiz?
Qeyd edək ki, 2021-ci ildə elan edilən layihə hazırda tikinti mərhələsindədir. Bloomberg-in layihə ilə bağlı adı açıqlanmayan mənbəyə istinadən verdiyi məlumata görə, layihəyə qoyulan külli miqdarda vəsait üçün kifayət qədər xarici investisiyanın olmaması səlahiyyətliləri narahat edir. Səudiyyə Ərəbistanı böyük neft gəlirlərinə malik olsa da, onun resursları qeyri-məhdud deyil. İlkin mərhələdə layihə hündürlüyü 500 m və eni 200 m olan göydələn cərgələrindən ibarət olacaq. Məhz investisiya olmadığından ilkin mərhələdə düz xətt şəhəri sadəcə 2.4 km uzunluğa sahib olacaq. Daha əvvəl isə onun 2030-cu ilə qədər əhali sayının 1.5 milyona çatacağı bildirilmişdi.
Son məlumata görə, bu rəqəm 300 mindən aşağı düşüb. Səlahiyyətlilər, şəhərin normal bir şəhər kimi ehtiyaclara uyğun olaraq böyüyəcəyini və lazım gəldikdə yeni iş yerləri, yaşayış yerləri və turizm sahələri əlavə ediləcəyini bildirir. Ən son tikinti videosuna baxdıqda layihənin hələ də çox iddialı və böyük miqyasda olduğunu görmək olar. Bununla belə, layihə 170 km uzunluğunda və 9 milyon insandan ibarət şəhər ola bilmək üçün hələ çox yol qət etməlidir.
