Bildiyimiz kimi, ötən gün çoxdandır gözlənilən GTA 6 treyleri ortaya çıxdı. Hətta ilk olaraq 5 dekabr saat 18:00-da yayımlanması gözlənilən video sızdırıldığı üçün Rockstar Games məcburən treyleri özü gecə saatlarında paylaşıb. Bununla belə 1 günə videonu milyonlarla insan izləyib. Bundan əlavə isə Elon Musk yenidən gündəmə gəlib. Belə ki, məşhur milyarder Elon Musk polisləri öldürmək istəmədiyi üçün GTA 5 oynamadığını açıqlayıb.
İlk öncə GTA 6 treylerindən sonra X platformasında Dan adlı istifadəçi heç bir GTA oyunu oynamadığını bildirib. Elon Musk isə bu paylaşıma cavab olaraq bildirib ki, “GTA-nı sınadım, amma cinayət törətməyi sevmirdim. GTA 5-in açılış səhnəsi polislərin güllələnməsini tələb edirdi. Mən bunu edə bilməzdim”. Oyun dünyasını yaxından izləyən və hətta X platformasında Diablonu canlı yayımlayan Musk, görünən odur ki, GTA seriyasının pərəstişkarı deyil. Buna səbəb isə oyunda cinayət törətməyin demək olar məcburi olmasıdır.
Onu da qeyd edək ki, GTA 6 treylerindən də məlum olduğu kimi yeni GTA oyununda biz Vice City şəhərinə geri dönəcəyik. Belə ki, Los Santosun maraqlı amma bir o qədər də solğun havasından sonra Vice Citynin nostaljik və canlı havası bütün oyun həvəskarlarını, xüsusilə GTA pərəstişkarlarını həvəsləndirib. O cümlədən oyunun qrafikləri, xəritənin genişliyi treylerdə ən çox diqqət çəkən məqamlardan olub. İlk olaraq 2025-ci ildə sadəcə PlayStation 5, Xbox Series X və Xbox Series S oyun konsollarına çıxış edəcək oyun sadəcə 1 il sonra PC istifadəçiləri üçün də əlçatan ola bilər.
