Dünyanın ən böyük fotovoltaik və ya günəş əsaslı mikro şəbəkəsi tikilir. Belə ki, Səudiyyə Ərəbistanının Qırmızı Dəniz Layihəsi bütünlüklə təmiz enerji ilə işləyəcək. Bu nəhəng təşəbbüs 400 MVt günəş enerjisi sistemi və 1,3 GWh gücündə enerji saxlama sistemi ilə dünyanın ən böyük fotovoltaik enerji saxlama mikroşəbəkəsinə ev sahibliyi edəcək.
Qeyd edək ki, bu iddialı layihə qlobal texnologiya nəhəngi Huawei tərəfindən həyata keçirilir. Layihənin tamamlanmasıyla Qırmızı Dəniz Layihəsi çərçivəsində inkişaf etdirilən bu mühüm turizm məkanı Səudiyyə Ərəbistanının cənub-qərbindəki Tabuk vilayətinin Qırmızı dəniz sahilində yerləşəcək. 28 min kvadrat kilometr kimi böyük bir ərazini əhatə edən bu layihə təmiz enerji və davamlı turizmin gələcəyi üçün əhəmiyyətli hesab edilir. 2030-cu ilə qədər tamamlanması planlaşdırılan Qırmızı dəniz şəhəri, 50 otel və 8000 otaqdan əlavə 22 ada və altı daxili məkana sahib olacaq.
1000-dən çox yaşayış yeri ilə cəmi bir milyon ziyarətçiyə ev sahibliyi edəcək şəhər, şəbəkədən kənar təmiz enerji ilə təmin ediləcək. Layihədə Huawei-nin FusionSolar Smart Array Energy Storage Solution (ESS) proqramından istifadə olunacaq. Bu mikro şəbəkə həlli Qırmızı Dəniz Layihəsinə öz enerji ehtiyaclarını müstəqil şəkildə ödəməyə imkan verəcək. Günəş və külək enerjisinin dəyişkən təbiəti bərpa olunan enerji layihələrinin təhlükəsiz və sabit işləməsi üçün enerjinin saxlanmasını vacib edir.
