Çin alimləri dünyada ilk dəfə olaraq tam hamiləlik prosesini həyata keçirə bilən “insanabənzər robot” üzərində işləyirlər. Süni rəhmlə təchiz edilən bu robot mayalanmadan doğuşa qədər bütün mərhələləri simulyasiya etməyi hədəfləyir. İlk prototipin gələn il təqdim edilməsi planlaşdırılır. Beləliklə, Çinlilər bu dəfə də dünyanın ilk hamiləlik robotunu hazırlayaraq bütün diqqətləri öz üzərlərinə cəlb etməyi bacarıblar.
Nanyang Texnologiya Universitetinin doktoru Zhang Qifengin sözlərinə görə, bu sistem ənənəvi inkubatordan çox fərqlidir. Robotun qarın boşluğunda amniotik maye və digər süni orqanlarla doldurulmuş süni uşaqlıq mayalanmadan doğuşa qədər bütün hamiləlik prosesini tam şəkildə simulyasiya edə bilər. Embrion bu mühitdə inkişaf edərkən, qida ehtiyaclarını xüsusi bir boru vasitəsilə alır. Dr. Zhang qeyd edib ki, “Texnologiya özünün yetkin mərhələlərindədir; indi bizim məqsədimiz robot daxilində bütün prosesi həyata keçirmək, insan-robot qarşılıqlı əlaqəsini təmin etməkdir”.
Oxşar üsul 2017-ci ildə heyvanlar üzərində sınaqdan keçirilib.Nature Communications jurnalında dərc edilən araşdırmada, vaxtından əvvəl doğulmuş quzu embrionu “biobaq” adlanan süni amniotik maye ilə doldurulmuş sistemdə dörd həftə inkişaf edib və tük yetişdirməyə başlayıb. Ancaq bu sistem yalnız mövcud embrionun böyüməsinə xidmət etdi. Çindəki yeni təşəbbüs fərqlidir, çünki o, insana bənzər bir robotun içərisində mayalanmadan doğuşa qədər tam hamiləlik dövrünü təmin etmək məqsədi daşıyır. Çində artan sonsuzluq nisbətləri bu cür layihələri ön plana çıxarır. Lancet jurnalında dərc olunan hesabata görə, ölkədə sonsuzluq nisbəti 2007-ci ildəki 11,9%-dən 2020-ci ildə 18%-ə yüksəlib. Nəticədə, süni mayalanma xidmətləri Pekin və Şanxay kimi böyük şəhərlərdə dövlət tibbi sığortasına daxil edilib. İlk prototipin bir il ərzində təqdim ediləcəyi gözlənilsə də, Çin rəsmiləri artıq etik və hüquqi aspektlər üzrə müzakirələrə başlayıblar. Layihənin gələcəyi təkcə elmi nöqteyi-nəzərdən deyil, həm də sosial və hüquqi baxımdan gərgin müzakirələrə səbəb ola bilər. Hamiləlik robotunun kommersiya versiyasının təxminən 14.000 dollara satılacağı gözlənilir.
