Naməlum bir hacker Çin tarixinin ən böyük məlumat sızıntısını yaşadıb. İddialara görə Şanxay polisinin verilənlər bazasına yol tapmağı bacaran şəxs 1 milyard Çin vətəndaşının məlumatlarını oğurlayıb. Hətta mövzu o qədər ciddi hal alıb ki, ölkənin məşhur “weibo” və “WeChat” tətbiqlərində də bununla bağlı heşteqlər bloklanıb. Çin höküməti, Şanxay Polis Departamenti və digər rəsmi qaynaqlar baş verən məlumat sızıntısı ilə bağlı heç bir rəsmi açıqlama verməyiblər. Lakin həmin naməlum hackerin indiyə qədər verdiyi detallar əldə edilən məlumatların həqiqi olduğunu göstərir. Həmin hacker Dark web forumlarından birində 1 milyard Çin vətəndaşının məlumatlarına yüksək məbləğ tələb edir.
1 milyard Çin vətəndaşının datası 10 bitcoin (~200.000$) qiymətə təklif olunur
Polis departamentindən sızdırılmış məlumatların ümumi həcminin təqribən 23TB (terabayt) olduğu iddia edilir. Həmin məlumatlar arasında insanların ad və soyadları, adresləri, telefon nömrələri, identifikasiya nömrələri, anadan olduğu yer, hansı cinayətləri törətdiyi kimi növbənöv məlumatlar yer alır. 1 milyard rəqəmi isə Çin xalqının təqribi 70%-lik hissəsinin datası əhatə edilir mənası daşıyır.
Asia Market tərəfindən verilən məlumata görə rəsmi mənbələr sakit qalsa da sızıntılar həqiqətən doğrudur. Hackerin göndərdiyi dataları analiz edən tədqiqatçılar dataların həqiqətən düzgün olduğu qənaətinə gəliblər.
Ehtimal edilir ki, hansısa dövlət qurumu tərəfindən aparılan “Elastic Search” (verillənlər bazasında məlumatların axtarışı kimi düşünə bilərsiniz) prosesindəki boşluq zamanı məlumatlar sızdırılıb. Məlumat transferi isə Huawei, Tencent, Alibaba şirkətlərinə məxsus serverlər üzərindən həyata keçirilir. Yəni ehtimal doğrudursa baş vermiş məlumat sızıntısında dolayı olaraq bu şirkətlər də rol oynayırlar. Hansısa təhlükəsizlik boşluğunun bu şirkətlərdən qaynaqlandığı məlum olarsa işlər daha da qəlizləşə bilər.
ChinaDan ləqəbli hacker isə 23 terabaytlıq sızdırdığı məlumatı 10 bitcoin qarşılığında satır. Təqribi 200.000$ səviyyələrində olan bu qiymət sizə çox görünə bilər. Lakin mənbələrin qeyd etdiyinə görə belə bir data qarşılığında hacker xeyli aşağı məbləğ tələb edir. Qeyd edək ki, datalara indiyə qədər 6 bitcoin (~116.000$) təklif edildiyi məlumdur. 1 milyard insanın şəxsi məlumatlarının oğurlanması ilə yadda qalan bu xəbər, Çin tarixinin ən böyük hack hadisəsi hesab olunmaqdadır.
