Çin Dövlət Təhlükəsizliyi Nazirliyi müəyyən irqi və ya etnik qrupun üzvlərini hədəfə ala biləcək “genetik silah” yaradılmasının mümkünlüyü barədə xəbərdarlıq edib. Qeyd edək ki, etnik bioloji silah kimi tanınan genetik silahlar, müəyyən bir qrupa qarşı yönəldilərək onların genetik cəhətdən biyologiyasını dəyişdirə bilir. Ümumiyyətlə dünyadakı bütün insan DNT-sinin 99% hissəsi eyni olsa belə, müəyyən etnik və ya irqi qrupun üzvlərini fərqləndirən əhəmiyyətli genetik fərqlər mövcuddur. Çinin Dövlət təhlükəsizlik nazirliyi öz hesabında qeyd edib ki, bu fərqli etnik və irqi qrupların aradan qaldırılması üçün yeni genetik silah hazırlanır.
Maraqlısı budur ki, biokimyəvi toksikologiya və biologiya sahəsində mütəxəssislər hesab edirlər ki, konkret etnik qrupları hədəf alan silahların yaradılması ehtimalı azdır və bu elmi fantaziya sahəsinə aiddir. Qeyd edək ki, bundan əvvəl ABŞ prezidentliyinə namizəd olan Robert F. Kennedi Jr. Çinin etnik bioloji silahlar hazırlaması barədə dünyaya xəbərdarlıq etmişdi. Hətta o bildirmişdi ki, bu təhlükənin qarşısını ala bilmək üçün ABŞ da genetik silah üzərində işləyir. Bioloji silahlar barədə ilk iddialar məhz Covid-19 epidemiyasının ilkin mərhələsində ortaya çıxmışdı. Bir çox insan bu epidemiyanın genetik silahdan qaynaqlandığını düşünürdü. Hətta epidemiyanın mərkəzinin məhz Çin olması bu iddiaları gücləndirirdi. Lakin daha sonradan mütəxəssislər bu epidemiyanın yayılmasının genetik silah ilə əlaqəli olmadığını ortaya çıxarmışdı.
Əslində genetik silahlar barədə iddialar yeni deyil. Belə ki, Britaniya Tibb Assosiasiyası 1999-cu ildə xəbərdarlıq etmişdi ki, yaxın gələcəkdə belə silahların hazırlanması mümkündür. 2021-ci ildə James Martin Nüvə Silahlarının Yayılmaması Tədqiqatları Mərkəzi tərəfindən dərc edilən hesabatda göstərilir ki, müəyyən qrupları hədəf alan silahlar genetik profilləşdirmə əsasında hazırlana bilər. Müxtəlif ölkələrin xəbərdarlıqlarına və bəyanatlarına baxmayaraq, ekspertlər bu cür silahların real təhlükədən daha çox elmi fantaziyanı əks etdirdiyini düşünür. Lakin yenə də Çinin genetik silahlar barədə xəbərdarlığı insanlarda şübhə doğurur.
