Kimsə Böyük Britaniyanın Skynet 1-A adlı ən qədim peykini kosmosda hərəkət etdirib. Maraqlısı budur ki, bunu kimin, nə vaxt və nə üçün etdiyi barədə məlumat yoxdur.
Britaniyanın ən qədim peyki Skynet-1A naməlum birisi tərəfindən yerindən tərpədilib. Onun kim tərəfindən, nə vaxt və nə üçün köçürüldüyü hələ də sirr olaraq qalır. Qeyd edək ki, Peyk ilk buraxıldığı zaman Britaniya ordusu üçün rabitə təmin edirdi. Təxminən 50 il əvvəl orbitə buraxılan peykin toqquşma təhlükəsi ilə üzləşdiyi bildirilir. 1969-cu ildə, insanların Aya ilk ayaq basmasından cəmi bir neçə ay sonra buraxılan Skynet-1A Britaniya qüvvələrini rabitə ilə təmin etmək üçün Afrikanın şərq sahillərində yüksəklərə yerləşdirilmişdi. İlkin missiyasını başa vurduqdan sonra təbii cazibə qüvvələrinə görə şərqə doğru Hind okeanı bölgəsinə keçməsi gözlənilirdi. Amma bu gün peyk Amerika qitəsindən 36 min kilometr yüksəklikdə, ilkin yerindən uzaqda yerləşir.
Yarım ton ağırlığında olan Skynet-1A əvvəlcə Afrikanın şərq sahillərindən Sinqapura qədər geniş rabitə sahəsi təmin etməklə Britaniyanın hərbi kommunikasiyalarına töhfə verib. Lakin mütəxəssislərin fikrincə, təbii orbital qüvvələr peykin hazırkı vəziyyətini izah etmək üçün kifayət deyil. Buna görə də, peykin 1970-ci illərdə qəsdən qərbə köçürülməsinə dair güclü sübutlar var. Lakin bu addımın arxasında kimin dayandığı hələlik məlum deyil. Kosmik məsləhətçi Dr. Stuart Eves, bildirir ki, “Bu hələ də vacibdir, çünki Skynet-1A-nı kim köçürdüsə, bizə heç bir yaxşılıq etmədi. Ölü olduğu üçün onun kosmosda toqquşma riski var və bizim” peykimiz olduğu üçün hələ də buna cavabdehik”. Dr. Eves əlavə edir ki, Skynet-1A-nın son əməliyyat mərhələsinə dair heç bir qeyd tapa bilməyib. Bundan əlavə, peyk 50 km radiusda gündə dörd dəfəyə qədər kosmik zibillə qarşılaşma potensialına malikdir ki, bu da həyəcan verici risk yaradır.
Ümumiyyətlə, Skynet-1A İngiltərəyə məxsus olsa da, əslində Britaniya istehsalı deyil. ABŞ-ın Philco Ford şirkəti tərəfindən istehsal edilən və artıq fəaliyyət göstərməyən peyk Amerika Hərbi Hava Qüvvələrinə aid Delta raketi ilə kosmosa göndərilib. Peyk əvvəlcə ABŞ-ın nəzarətində olsa da, proqram təminatının sınaqdan keçirilməsi yoxlanıldıqdan sonra onun nəzarəti Britaniya Hərbi Hava Qüvvələrinə (RAF) verilib.
