Son zamanlar aktuallaşan süni intellekt əsaslı həllərin əhəmiyyətini, onların müxtəlif sektorların inkişafına verə biləcəyi töhfələrini nəzərə alaraq, Azərbaycan Mərkəzi Bankı (AMB) ilə Rəqəmsal İnkişaf və Nəqliyyat Nazirliyi (RİNN) arasında Süni intellekt Alyansı yaradılması barədə anlaşma memorandumunu imzalanıb.
Məlumata görə, sənədin imzalanmasında başlıca məqsəd ölkəmizdə süni intellekt sahəsində layihələrin, təşəbbüslərin və ideyaların dəstəklənməsi, o cümlədən maliyyə bazarlarında birgə layihələrin həyata keçirilməsi, süni intellekt sahəsində bacarıqların, texnologiyaların, ekosistemin, infrastrukturun və idarəetmə mexanizmlərinin formalaşdırılması üzrə tədbirlərin görülməsinin təşkili, bununla da Azərbaycanın süni intellekt sahəsində regional liderə çevirilməsidir.
Bu əməkdaşlıq çərçivəsində süni intellektə əsaslanan startapların və şirkətlərin Azərbaycana cəlb edilməsi, müxtəlif sektorlarda süni intellekt əsaslı innovasiyaların təşviq edilməsi, bu sahədə həllərin və bacarıqların artırılması üçün qabaqcıl təşkilatlarla əməkdaşlıq münasibətlərinin qurulması üzrə tədbirlər həyata keçiriləcək. Eyni zamanda, süni intellekt sahəsində biliklərin artırılması məqsədilə müvafiq təlim, seminar və konfransların təşkili kimi məsələlər diqqət mərkəzində saxlanılacaq.
Əlavə olaraq qeyd edək ki, bu barədə rəqəmsal inkişaf və nəqliyyat naziri Rəşad Nəbiyev “X” sosial şəbəkəsindəki hesabında yazıb. Nazir bildirib ki, “Mərkəzi Bankın sədri Taleh Kazımovla Süni İntellekt Alyansının yaradılması barədə Anlaşma Memorandumunu imzaladıq. Məqsəd bu sahədə çalışan mütəxəssislərə artan tələb fonunda istedadları yetişdirmək, maraqlı tərəflər üçün təcrübə mübadiləsini təmin etmək və sahəyə resurs cəlb edilməsini təşviq etməkdir”.
