Avropa Birliyinin siyasət planlaşdırıcısı və koordinatoru olan Avropa Komissiyası komosda məlumat mərkəzləri yerləşdirmək istəyir. Belə ki, Horizon Europe tədqiqat proqramının bir hissəsi olan və iqlim dəyişiklikləri ilə daha effektiv şəkildə mübarizə aparmağı hədəfləyən layihəyə Thales Alenia Space adlı şirkət rəhbərlik edəcək.
Avropa Komissiyası iddia edir ki, məlumat həcmlərinin gün keçdikcə artması bütün dünyada yeni məlumat mərkəzlərinin istifadəyə verilməsinə gətirib çıxarır. Yeni mərkəzlərin açılması isə öz növbəsində ekologiyaya ciddi şəkildə təsir göstərir. Bu problemin qarşısını almaq üçün isə Avropa Birliyi alternativ məlumat mərkəzləri axtarışındadır. Avropa Birliyi 2 milyon avro büdcəyə sahib ASCEND layihəsi ilə ətraf mühitə təsir göstərməyən və məlumatları saxlaya bilən yeni məlumat mərkəzi üzərində çalışır.
Thales Alenia Space şirkətinin rəhbərlik etdiyi layihənin əsas ideyası orbitdə günəş enerjisi ilə işləyə bilən məlumat mərkəzinin yaradılmasıdır. Bu məlumat mərkəzi kosmosda yerləşdiyi üçün heç bir ekoloji təsirə malik olmayacaq. Thales Alenia Space şirkəti hal-hazırda orbitdə yerləşdirilən məlumat mərkəzi ilə yerdəki məlumat qəbuledici məntəqələr arasındakı əlaqəni təmin edə bilən optik rabitənin effektivliyin iaraşdırır.
Avropa Komissiyası bildirir ki, bu layihə Avropanın 2050-ci ilə kimi karbon neytrallığına çatmasına şərait yarada bilər. ASCEND layihəsi, Komissiyanın verdiyi məlumata görə Horizon Europe tədqiqat proqramı daxilində 2027-ci ilə qədər həyata keçiriləcək. Proqramın ümumi büdcəsi isə 95.5 milyard dollardır. Layihəyə rəhbərlik edən şirkət bildirib ki, kosmosda yerləşdirilmiş məlumat mərkəzlərinin təmiri və nəzarəti EROSS IOD layihəsi vasitəsilə həyata keçirilə bilər. Bu layihə peyklərin ömrünün uzadılması məqsədilə orbitdə robotların istifadəsini nəzərdə tutur və bu layihəyə də Thales Alenia Space şirkəti rəhbərlik edir.
