Ötən aylarda SpaceX-ə məxsus Starlink Aviation peyk internet xidmətinin təyyarələrə 350 Mbps sürətində internet təklif etdiyini xəbər vermişdik. Hətta bir neçə aviaşirkət artıq bu xidmətdən istifadə etmək üçün SpaceX ilə müqavilə bağlamışdı. İndi isə Avropa Komissiyası uçuş zamanı Təyyarə Rejimi funksiyasının məcbur olmaması barədə qərar verib. Beləliklə artıq hava səyahətində yeni dövr başlayır. Artıq sərnişinlərin təyyarədə internet xidmətlərinə qoşulması üçün heç bir maneə qalmadı. Qeyd edək ki, yeni qərarın gələn ildən qüvvəyə minəcəyi gözlənilir. Həmçinin SpaceX şirkətinin təklif etdiyi peyk internet xidməti də gələn ilin ortalarında istifadəyə veriləcək.
Təyyarə Rejimi funksiyası tarixə qovuşur
Xatırladaq ki, Avropa İttifaqı komissiyası ilk dəfə 2008-ci ildə sərnişinlərə təyyarədə bəzi internet xidmətlərindən istifadə etməyə icazə versə də, sonralar bu qərar ləğv olundu. Buna səbəb isə bu xidmətin həm bahalı həm də çox yavaş olması idi. Bundan sonra isə sərnişinlər üçün yeganə alternativ smartfonlarını Təyyarə Rejimi funksiyasında istifadə etmək idi.
İndi isə Avropa Komissiyasının yeni qərarı ilə hava nəqliyyatından istifadə edən sərnişinlər bütün internet xidmətlərindən istifadə edə biləcək. Qeyd edək ki, qərara görə Avropa İttifaqına üzv ölkələri 30 iyun 2023-cü ilə qədər 5G xidmətini təyyarələr üçün əlçatan etməlidir. Beləliklə, sərnişinlər 5G internet xidməti vasitəsi ilə 100 Mbit/s sürətindən çox internetdən istifadə edə biləcəklər.
Böyük Britaniyanın Uçuş Təhlükəsizliyi Komitəsinin sədri Dai Whittingham-ın sözlərinə görə, telefonların avtomatik uçuş idarəetmə sistemlərinə təsiri təhlükəli səviyyədə deyil. Həmçinin o qeyd edib ki, 5G tezliklərinin uçuşlara təsir edə biləcəyi və hətta mümkün qeyri-dəqiq hündürlük göstəricilərinə səbəb ola biləcəyi ilə bağlı narahatlıqlar da əsassızdır.
