Günümüzün ən böyük problemlərindən olan sürtünmə artıq həll olunacaq. Belə ki, alimlər hərəkət edən bütün sistemlərdə sürtünməni sıfıra endirən xüsusi örtük hazırlayıblar. Qeyd edək ki, yeni hazırlanmış örtük sürtünməni 100 dəfəyə qədər azalda bilir. Ümumiyyətlə müasir dövrdə nəqliyyat vasitələrinin, qatarların və digər vasitələrin ən başlıca problemi məhz sürtünmədir. Sürtünmə bu vasitələrin daha tez sıradan çıxmasına səbəb olur. Yeni hazırlanmış örtük isə xüsusi karbon nanoborucuqlarına əsaslanır.
Qeyd edək ki, sürtünməni sıfıra endirən xüsusi örtük hazırlamaq üçün alimlər bir neçə mərhələli sınaqlar keçirib. İlk öncə onlar paslanmaz polad diski isidərək səthdə metal oksid hissəcikləri yaratdılar. İkinci mərhələdə isə onlar bu oksidlərə karbon əlavə edib. Daha sonra metal oksidləri karbonu bir-birinə yapışdıraraq boruvari struktur əmələ gətirib. Sonda isə alimlər hazırladıqları örtüyə sürtkü yağı əlavə etdilər. Çünkü yağ olmadan sürtünmə karbon nanoborucuqlarını zədələyir və örtük yaranmır.
Maraqlısı budur ki, yeni xüsusi örtük sürtünməni rekord həddə 0.001-ə endirib. Hətta nanoborucuqlar 500 min sürtünmə dövründən sonra belə öz funksiyasını qoruyub saxlayıb. Bununlada xüsusi örtük 12 gün sürtünməni sıfıra endirə bilib. Bu isə yeni örtüyün dayanıqlı olduğunu sübut edir. Qeyd edək ki, yeni örtük bir çox mexanizmin ömrünü əhəmiyyətli dərəcədə artıra bilər. Alimlər isə hazırda yeni xüsusi örtük üçün patent almağı gözləyir. Gələcəkdə bu örtüyü bir çox sahədə görmək mümkün ola bilər.
