LuGenesys biotexnoloji şirkətinin alimləri, kiçik qaraciyər yetişdirmək üçün insan orqanizminə donor hüceyrələrin implantasiya edilməsi ilə bağlı ilk proses barədə məlumat veriblər. Qeyd edək ki, birdəfəlik həyata keçirilən əməliyyat, qaraciyər çatışmazlığı olan xəstələrdə və orqan transplantasiyası keçirən xəstələrdə pilot klinik tədqiqatların başlanğıcını göstərir. Gələcəkdə böyrək və mədəaltı vəzinin böyüdülməsi üçün oxşar tədqiqatların aparılması planlaşdırılır. Beləliklə, alimlər canlı bir insanın bədənində birbaşa qaraciyər böyütməyə başlayıb.
Mini qaraciyər böyütmə əməliyyatı insan orqanizminə donor hüceyrələrin yerləşdirilməsinə əsaslanır. Nature mənbəsi bildirir ki, bu, xəstəlikdən zədələnmiş əsas qaraciyərin yanındakı limfa düyünlərində həyata keçirilir. Bir neçə aydan sonra hüceyrələr çoxalmağa başlayır və xəstənin itirilmiş qan filtrləmə funksiyasını bərpa edə biləcək struktur yaradılmağa başlayır. Bu metodun uğuru siçanlar, itlər və donuzlar üzərində aparılan klinik tədqiqatlarda təsdiqlənib.
Pilot tədqiqatda alimlər qaraciyər çatışmazlığı olan 12 xəstə ilə işləyəcəklər. Birinci könüllü artıq effektiv müalicə alıb və təqib mərhələsindədir. Qaraciyərin filtrasiya funksiyası stabilləşən kimi mini orqanın böyüməsini dayandıracağına ümid edilir. Başlanğıcda alimlər, limfa düyünlərində bir neçə donor hüceyrə fokusunu meydana gətirəcək. Bu yolla isə orqanizmi dəstəkləyə biləcək miniorqanizmlərin optimal sayını və ölçüsünü müəyyən edəcəklər.
Hələlik mini orqanların istifadəsi müvəqqəti hesab olunur. Bu proses sadəcə donordan qaraciyər transplantasiyası alarkən müvəqqəti tədbirdir. Lakin gələcəkdə, tədqiqatçılar immunosupressiv dərmanlara ehtiyacı aradan qaldırmaq üçün donor kök hüceyrələr əvəzinə xəstənin öz kök hüceyrələrindən istifadə etməyi də planlaşdırırlar.
