Volkswagen (VW), Audi, Seat və Skoda markalarına aid 800 min elektromobil sahibinin bir neçə terabaytlıq həssas məlumatları səhv konfiqurasiya edilmiş və qorunmayan Amazon bulud saxlama sistemi səbəbindən aylarla sızdırılıb. Bu kütləvi məlumat sızması təkcə avtomobil sahiblərinin GPS koordinatlarını deyil, həm də batareya vəziyyəti və vtomobilin işlək olub-olmaması kimi detalları ortaya çıxarıb.
Qeyd edək ki, məlumat sızması təkcə Almaniyada yaşayan VW, Audi, Seat və Skoda elektrik avtomobillərinin sahiblərinə deyil, Avropa və dünyanın digər hissələrinə də təsir edir. Həssas GPS koordinatlarının məruz qalan məlumatlar arasında olması böhranın ölçüsünü artırır. Məlumatlara görə, VW Group-un onlayn xidmətləri vasitəsilə əldə edilən əlavə məlumatlar sayəsində avtomobilləri sahiblərinin şəxsi identifikasiya məlumatları ilə əlaqələndirmək mümkündür. Konkret olaraq, 800 min işin 466 000-də məkan məlumatları o qədər həssas idi ki, giriş imkanı olan hər kəs hər bir elektromobil sahibinin gündəlik vərdişlərini təfərrüatlı şəkildə profilləşdirə bilərdi.
Spiegel-in hesabatına görə, sızıntıdan zərər çəkənlər arasında təkcə adi vətəndaşlar deyil; Alman siyasətçiləri, sahibkarları, Hamburq polisi (bütün elektrik avtomobil parkı daxil olmaqla) və hətta kəşfiyyat xidmətinin əməkdaşları da var. Bu qalmaqalın mənbəyi VW Group-un proqram təminatı inkişaf etdirmə şirkəti Cariad-da baş verən səhv olub. 2024-cü ilin yayında baş verən bu səhv həssas məlumatların qorunmadan saxlanmasına səbəb olub. Məlumatların əksəriyyəti 2024-cü ilə aid olsa da, bəzilərinin daha da geriyə getdiyi bildirilib. Hadisəni ifşa edən şəxs Avropanın ən böyük haker icması olan Chaos Computer Club (CCC) olub. CCC anonim tipsterin köməyi ilə məlumatları əldə edib və VW Qrupuna vəziyyəti düzəltmək üçün 30 gün vaxt verərək xəbərdarlıq edib.
