Amerikalı alim Dr. Joseph Dituri, 100 gün su altında 9 kvadrat metrlik ərazidə qaldıqdan sonra bədən yaşının 20 il cavanlaşdığını ictimaiyyətə rəsmi olaraq açıqlayıb. ABŞ Hərbi Dəniz Qüvvələrinin təqaüdçü alimi Dituri keçən il 100 günlük çətin mübarizəsini tamamlayıb. Qeyd edək ki, alim, 9 kvadrat metr ərazidə düz 100 gün yaşayıb və Ginnesin Rekordlar kitabına düşüb.
Alimin məqsədlərindən biri təzyiqdən sonra 100 gün su altında yaşayan insanın bədənində hansı dəyişikliklərin baş verəcəyini araşdırmaq olub. 2023-cü ilin mart ayında suyun altına enən və iyun ayında ortaya çıxan Dituri təcrübə boyu tibbi ekspertlər və psixoloqlar tərəfindən daim nəzarətdə saxlanılıb. 100 gün boş qalmayan alim dənizdə olarkən tələbələrinə dərs deməyə davam edib və hətta suda təkhüceyrəli orqanizm aşkar edib. Bunun tamamilə yeni bir növ olduğunu bildirən alim, “İnsanoğlu buraya minlərlə dəfə dalış edib – və bu orqanizm həmişə burada olub. Sadəcə biz baxmadıq” deyib.
Keçən ilin iyun ayında yenidən üzə çıxanda alim, xromosomlarda tapılan və çox vaxt ömrün uzadılması ilə əlaqəli strukturlar olan uzun telomerlərdə də daxil olmaqla sağlamlığının bir çox aspektlərdə yaxşılaşdığını iddia edib. Dr. Dituri bildirib ki, “Hazırda 56 yaşım var. Su altına dalış etmədən əvvəl bioloji yaşım 44 idi. Sudan çıxdıqda isə bədənim 20 il cavanlaşdı”. Dr. Dituri həmçinin qeyd edib ki, o, sualtı missiyasından çıxanda qan testləri bədənindəki bütün iltihab əlamətlərinin 50 faiz azaldığını göstərib.
