Geely brendinin lüks elektromobil şirkəti olan Zeekr hələ yeni yaranmasına baxmayaraq iddialı elektromobilləri ilə bazarda bütün diqqətləri öz üzərinə cəlb edə bilmişdi. İndi isə Zeekr brendi ilk elektrikli sedanı olan yeni Zeekr 007 elektromobilini Çində təqdim edib. Bu gün Guangzhou avtosalonunda təqdim edilən elektromobil yeni eksteryeri ilə diqqət çəkib. Ümumiyyətlə Zeekr yeni elektrikli sedanı ilə elektromobil bazarındakı rəqabəti daha da gücləndirəcək. Hətta şirkət bildirir ki, elektromobil təqdim edildikdən 30 dəqiqə sonra artıq 5 mindən çox sifariş alınıb.
Bildiyimiz kimi, Zeekr brendi sadəcə 2 il əvvəl yaranıb. Lakin şirkət ilk modeli Zeekr 001 ilə həm dizayn, həm də performans tərəfində mükəmməl iş çıxarmışdı. İndi isə yeni Zeekr 007 elektromobili şirkətin ilk sedanı adını alıb. Eksteryer tərəfində elektromobil özünəməxsus üfüqi led fara dizaynına sahib olub. Habelə soldan-sağa uzanan bu üfüqi faranın tam ortasında Zeekr loqosu yer alır. Ön tərəfdəki, bamper demək olar ki, çox sadədir. Qeyd edək ki, elektromobilin uzunluğu 4865 mm, eni 1900 mm və hündürlüyü 1450 mm və təkər bazası 2928 mm-dir. İnteryer tərəfində elektromobil ağıllı cihazlar paneli ilə təchiz edilib. O cümlədən elektromobilin beyni məhz Qualcomm şirkətinə məxsus Snapdragon 8295 prosessorudur.
Qeyd edək ki, yeni elektromobil Zeekr brendinin özünün inkişaf etdirdiyi ADAS (Advanced Driver Assistance System) sistemi ilə də təchiz edilib. Habelə bu sistem 2 Nvidia Drive Orin çipindən istifadə edir. Əlavə olaraq LiDAR, 12 HD kamera, beş millimetrlik dalğa radarı və 12 ultrasəs radarı elektromobilə quraşdırılıb. Texniki cəhətdən isə yeni Zeekr 007 2 versiyada təklif olunur. Bunlar müvafiq olaraq 100 km/saat sürətinə 2.84 saniyədə sürətlənə bilən arxa ötürücülü, digəri isə 5.4 saniyədə sürətlənə bilən tam ötürücülü versiyalardır. 800 V yüksək gərginlikli arxitekturaya əsaslanan elektromobilin giriş səviyyəli versiyası 688 km mənzilə, uzun mənzilli versiyası isə 870 km mənzilə sahibdir. Avtomobilin başlanğıc qiyməti isə Çində 31730 dollardır.
