Avropanın ən böyük avtomobil mərkəzli ölkəsi olan Almaniya əksər yanacaqdoldurma məntəqələrində şarj stansiyalarının quraşdırılmasını tələb edəcək. Almaniya kansleri Olaf Şolz Münhen avtosalonunda çıxış edərək, elektrikli avtomobillərin gələcəyi üçün əhəmiyyətli bir qanun qəbul edəcəklərini açıqlayıb.
Bu qanunla Almaniya Avropada bütün yanacaqdoldurma məntəqələrinin 80 faizində ən azı 150 kilovatlıq sürətli şarj stansiyalarının quraşdırılmasını tələb edən ilk ölkə olacaq. Açıqlamaya görə, hazırda Almaniyada ictimaiyyətə açıq olan 90 min fərqli şarj stansiyası var. Lakin ölkə bunu ciddi şəkildə artırmaq istəyir, hətta 2030-cu ilə qədər 1 milyon enerji doldurma məntəqəsi açmağı hədəfləyir.
Bildirilir ki, aprelin sonunda Almaniyada yollarda cəmi 1,2 milyon elektrik avtomobili var idi və ölkə bunu artırmaq üçün əslində, yanacaqdoldurma stansiyalarından da yararlanaraq şarj şəbəkəsini genişləndirmək istəyir. Elektrikli avtomobillərin qəbulunun daha geniş bir şarj şəbəkəsi vasitəsilə artacağı düşünülür. Almaniyadakı nəhəng avtomobil istehsalçılarının məhsul çeşidlərində çoxlu elektrik avtomobilləri olmasına baxmayaraq, almanlar hələ də daxili yanma mühərrikli avtomobillərə üstünlük verirlər.
Keçən ay Avropada elektrikli avtomobil sürücüləri üçün əhəmiyyətli bir qərar verildi. Euronews-da yer alan xəbərə görə, elektrikli avtomobil modellərinin populyarlaşdırılması ilə bağlı ortaq qərar qəbul edən “Aİ Şurası”, elektrikli avtomobillərin Avropada səyahətini asanlaşdırmaq məqsədi daşıyan tənzimləməni qəbul edib. Müvafiq olaraq, Aİ yollarında hər 60 km-də sürətli enerji doldurma stansiyaları quraşdırılacaq. Xüsusilə Aİ yollarında sürücülərin məsafə narahatlığını azaldacaq qaydaya əsasən, 2025-ci ildən başlayaraq əsas nəqliyyat dəhlizləri boyunca hər 60 km-də minik avtomobilləri və yük maşınları üçün ən azı 150 kVt gücündə sürətli enerji doldurma stansiyaları quraşdırılacaq.
