“Xiaomi” və “Polyphony Digital”, “Gran Turismo World Series 2025” tədbirinin birinci mərhələsi çərçivəsində əhəmiyyətli bir əməkdaşlığı elan etdi. Bu iş birliyi nəticəsində, “Xiaomi”nin flaqman statuslu yüksək performanslı lüks elektrikli avtomobili Xiaomi SU7 Ultra, PlayStation 4 və PlayStation 5 üçün hazırlanan dünyaca məşhur yarış simulyatoru Gran Turismo 7-ə əlavə ediləcək. Bu, “Gran Turismo” seriyasında ilk dəfə bir “Xiaomi” modelinin yer alması deməkdir.
“Gran Turismo”, real dünya performansını əks etdirən mühəndislik parametrləri sayəsində dünyanın ən realistik sükan arxası simulyatorlarından biri kimi tanınır. =Avtomobil dinamikası və təhlükəsizliyi mövzularında innovasiyaları təşviq edir və bütün dünyadakı avtomobil həvəskarlarını bir araya gətirir. Xiaomi SU7 Ultra-nın oyuna daxil edilməsi, avtomobil sənayesində ağıllı və yüksək performanslı elektrikli nəqliyyat vasitələrinin yüksəlişini simvolizə edir.
“Gran Turismo”nun yaradıcısı Kazunori Yamauçi və Xiaomi Korporasiyasının Təsisçisi, İdarə Heyətinin sədri və CEO-su Lei Jun, may ayında Pekində bir araya gəliblər. Səfər zamanı Yamauçi, Xiaomi SU7 Ultra ilə təsiredici bir test sürüşü həyata keçirib və Yizhuangdakı Xiaomi elektrikli avtomobil zavodunu ziyarət edib. Kazunori Yamauçi görüşlə bağlı bunları deyib:
“Xiaomi ilə bu əməkdaşlığa başlamaqdan böyük məmnunluq duyuruq. Çin avtomobil sektoru son illərdə böyük bir inkişaf yolu keçib. Xiaomi isə sektora yeni addım atmasına baxmayaraq, smartfonlardan geyilə bilən texnologiyalara, ev alətlərindən avtomobillərə qədər uzanan geniş ağıllı ekosisteminin bir hissəsi olaraq SU7 kimi təsirli bir avtomobil istehsal etməyi bacarıb. Üstəlik, SU7 Ultra prototipi Nürburqrinq trasında ənənəvi performans standartlarını aşaraq diqqətçəkən bir uğura imza atıb. Bütün bunlara yaxından şahid olmaq, Xiaomi-nin cəsarətindən, marağından, ehtirasından və qətiyyətindən çox təsirlənməyimə səbəb oldu. Bu yanaşma, Gran Turismo və Polyphony Digital-in fəlsəfəsi ilə də güclü şəkildə üst-üstə düşür.”
Dünyanın aparıcı texnologiya şirkətlərindən olan “Xiaomi”, 2024-cü ildə ilk ağıllı elektrikli avtomobili olan Xiaomi SU7-nin təqdimatı ilə “İnsan x Avtomobil x Ev” ekosistemini tamamladı.
Seriyanın ən üst modeli olan Xiaomi SU7 Ultra, “Xiaomi”nin özünün hazırladığı HyperEngine V8s (27.200 dövr/dəq; 578 PS; 635 N·m) mühərriki də daxil olmaqla, markaya xas bir çox yeniliyi özündə birləşdirir. Bu üç mühərrikli xüsusi konfiqurasiya sistemi sayəsində 1,548 PS güc, 350 km/saatdan yuxarı maksimal sürət və 0–100 km/saat sürətlənməsini 1,98 saniyəyə çatdıran SU7 Ultra, dördqapılı avtomobillər kateqoriyasında bir çox trek rekordunun da sahibidir.
