Çinin texnologiya nəhəngi Xiaomi yenə elektromobili ilə gündəm mövzusu olub. Belə ki, daha əvvəl elektromobilin real görüntüləri internetə sızdırılmışdı. İndi isə yeni ortaya çıxan məlumatlara görə ilk Xiaomi elektromobili 800 km mənzilə sahib olacaq. Xatırladaq ki, ötən aylarda Xiaomi Çində yerləşən Milli İnkişaf və İslahat Komissiyasından (NDRC) SU7 elektromobil modeli üçün icazə almışdı. NDRC, Çinin avtomobil sənayesinə yeni investisiyaları təsdiqləyən və ya rədd edən dövlət orqanıdır və Xiaomi-nin buradan təsdiqlənməsi onun ilk avtomobilini istehsala qoyuması üçün yaşıl işıq olmuşdu.
Çində Sənaye və İnformasiya Texnologiyaları Nazirliyinin paylaşdığı ən son siyahıya görə, ilk Xiaomi elektromobili SU7, 101 kVt batareya və 800 km mənzilə sahib olacaq. Ümumiyyətlə 28 dekabr tarixində yeni elektromobili təqdim edəcəyi gözlənilən Xiaomi indiyə qədər məlumatları çox gizli tutmağı bacarmışdı. Ötən ay isə elektromobilin dizaynı sızdırıldıqdan sonra indi də mənzili ortaya çıxıb. 800V arxitekturalı və 660 at gücündə cüt elektrik mühərrikli elektromobil 2 versiyada təqdim edilə bilər.
Çin mediasının məlumatına görə elektromobilin daha uzun məzilli versiyasında batareya CATL tərəfindən hazırlanarkən 73.6 kVt batareya BYD tərəfindən istehsal olunacaq. LiDAR sensorlu elektromobil avtonom idarəetmə və qabaqcıl xüsusiyyətləri ilə bazarda rəqabəti gücləndirəcək. Qeyd edək ki, Xiaomi SU7 elektromobili texnologiya nəhənginin Pekin şəhərindəki 720 min kvadratmetr sahədə inşa edilən nəhəng fabrikində BAIC Motor lisenziyası ilə istehsal ediləcək.
