Teslanın Şimali Amerika şarj standartı NACS nəhəng avtomobil şirkətləri tərəfindən qəbul edilməyə davam edir. Belə ki, indi Volkswagen, Porsche və Audi Teslanın məşhur şarj standartını qəbul edəcəklərini rəsmi olaraq elan ediblər. Qeyd edək ki, Volkswagen Tesla şirkətinin Şimali Amerika Şarj Standartı olan NACS-ı qəbul edəcəyini elan edən ən son avtomobil istehsalçısı olub. Alman avtomobil nəhəngi verdiyi açıqlamada Audi, Porsche və yeni avtomobil markası Scout Motors daxil olmaqla istehsal ediləcək elektromobillərin 2025-ci ildən etibarən NACS şarj girişinə sahib olacağını bildirib.
Nəhayət Volkswagen brendi də Teslanın şarj standartını qəbul edir. Hətta alman avtomobil nəhəngi mövcud elektromobil sahiblərini Tesla şirkətinin Supercharger şəbəkəsindən yararlanması üçün adapter həllərini araşdırdığını bildirib. Habelə alman avtomobil nəhəngi 2025-ci ilə qədər elektromobil sahibləri üçün yeni şarj həlli təqdim edəcək. Yeni razılaşma ilə Volkswagen elektromobilləri də Şimali Amerikadakı 15000 Supercharger ştansiyasından istifadə imkanı əldə edəcək.
Ümumiyyətlə Tesla ilk olaraq NACS adlı şarj texnologiyasını 2022-ci ilin noyabrında digər avtomobil istehsalçıları üçün istifadəyə açıq olduğunu elan etmişdi. Məhz bu tarixdən sonra isə avtomobil nəhəngləri eləcədə ilk olaraq Ford bu standartı qəbul etməyə başladı. Audi, Bentley, Bugatti, Porsche və Lamborghini kimi markaları öz çətiri altında birləşdirən Volkswagen qrupu bu günə qədər bu mövzuda səssiz qalmışdı. İndi isə General Motors, Mercedes-Benz, BMW, Ford, Nissan, Hyundai, Toyota, Subaru, Mini, Lucid, Rivian, Honda, Kia və Volkswagen qrupu NACS-a keçid edəcəyini açıqlayıb. Hələlik isə Jeep, Ram, Chrysler və Peugeot da daxil olmaqla bir sıra brendlərin arxasında duran ana şirkət Stellantis NACS standartına qoşulmayıb.
