Dünyanın ən böyük avtomobil istehsalçısı məhz Toyota Motor Company hesab olunur. Bu şirkət hibdrid avtomobillərin populyarlaşmasında mühüm rol oynasa da, onu elektromobillərin pioneri adlandırmaq doğru olmaz. Hətta şirkət tam elektrikli avtomobillərin məşhurlaşmasına və onların bütün dünyada yayılmasına qarşı çıxmaqda davam edir. Ümumiyyətlə Toyotaya görə elektromobillərin qlobal bazarda payı maksimum 30% ola bilər və bu göstəricini ötə bilməz.
Artıq hərkəsə məlumdur ki, elektromobillərin dünya bazarındakı payı sürətlə artır. Hətta, bu bazar payının əsas hissəsi də çinli elektromobil istehsalçılarının üzərinə düşür. Ötən il isə BYD brendi elektromobil satışlarında Tesla kimi böyük elektromobil nəhəngini də ötməyi bacarmışdı. Hazırda Norveçdə elektrik avtomobilləri artıq bütün yeni avtomobil bazarının 82%-dən çoxunu təşkil edir. İsveçdə isə bu pay artıq 32%-ə çatıb. Toyota MotorGP sədri Akio Toyoda bu yaxınlarda iştirak etdiyi tədbirdə ənənəvi olaraq verdiyi bəyanatları yenilədi. Onun sözlərinə görə uzunmüddətli dövrdə elektromobillər ilkin avtomobil bazarının yalnız 30%-ni tuta biləcək. Avtomobil bazarının digər hissəsini məhz daxili yanma mühərrikli avtomobillər, hibridlər və hidrogen avtomobilləri təşkil edəcək.
Ümumiyyətlə Toyotaya görə elektromobillərin bazar payı 30% həddindən çox olmayacaq və şirkət elektrikli avtomobil satışlarında hələ də maraqlı deyil. Toyota açıq şəkildə daxili yanma mühərrikli yeni avtomobillərin işlənib hazırlanmasına davam etmək niyyətində olduğunu və daha əvvəl də bu güc aqreqatlarının benzin və dizel əvəzinə hidrogenə keçirilməsi ideyasını irəli sürmüşdü. Toyota prezidentinin izah etdiyi kimi, nəqliyyat vasitələrinin seçimini yalnız elektromobillərlə məhdudlaşdırmaq düzgün olmazdı, çünki dünyada yaşayan bir milyard insanın hələ də elektrik enerjisinə çıxışı yoxdur.
Onu da qeyd edək ki, Toyota ötən il cəmi 95 min elektrikli avtomobil istehsal edib. Bu isə istehsal proqramının sadəcə 1% hissəsini təşkil edir. Bununla belə Toyota da 2026-cı ilə qədər illik elektrik avtomobil istehsal həcmini 1.5 milyona çatdırmağı düşünür. Onilliyin sonuna qədər isə şirkət illdə 3.5 milyon avtomobilə çatmağı hədəfləyir.
