Son zamanlarda nəhəng avtomobil şirkətləri bazara yeni texnologiya ilə təchiz olunmuş elektromobilləri çıxardırlar. Eyni zamanda elektromobil sektoru lüks brendlərə doğru yönəlir. Avtomobil bazarında öz sözünü demiş brendlərdən biri olan Rolls-Royce da ötən gün ilk elektromobili olan Spectre kupesini təqdim edib. Rolls-Royce on ildən artıqdır ki, elektrik avtomobilləri ilə təcrübə aparır belə ki, 2011-ci ildə şirkət elektrikli 102EX prototipini təqdim etsə də layihə uğursuz alınmışdı.
Britaniya brendi hər zaman ən az səs-küy və titrəyiş səviyyəsinə (vibrasiyalara) malik olan avtomobil istehsal etməyə çalışıb. Brendin dünyada məşhurlaşmasının səbəbi də elə məhz budur. Daxili yanma mühərrikindən elektrik mühərrikinə keçid isə, bu istiqamətdə mühüm irəliləyiş sayıla bilər. Artıq elektrikli Rolls-Royce reallığa çevrilib. Yeni Spectre elektromobili 2008-2016 illər aralığında istehsal edilmiş Rolls-Royce Phantom kupesinin varisi kimi adlandırmaq olar.
Rolls-Royce Spectre elektromobili hansı yeniliklərə malikdir?
Yeni elektromobilin uzunluğu 5453 millimetr, eni 2080 millimetr və hündürlüyü 1559 millimetrdir. Təkər bazasının ölçüsü 3210 millimetr təşkil edir. Şirkət yeni modeldə ənənəvi Rolls-Royce dizaynına sadiq qalsa da bir neçə yenilik əlavə edib. Belə ki, artıq gündüz hərəkət işıqları yuxarıda, tündləşdirilmiş əsas fənərlər isə aşağıda yerləşir. Elektromobilin ön tərəfində radiator barmaqlığının ənənəvi dizaynı saxlanılıb, əlavə olaraq isə onun işıqlandırılması üçün içərisində 22 işıq diodu quraşdırılıb.
Mühəndislər aerodinamika üzərində çox yaxşı işləyiblər. Belə ki, hamarlanmış künclər, dəqiqləşdirilmiş səthlər və hətta ön hissədəki heykəlciyin optimallaşdırılmış forması, yeni Rolls-Royce modelinin 0,25 sürtmə əmsalına çatmasına kömək edib. Mühəndislərin yeni aerodinamik dizayna ən az 830 saat sərf etdikləri deyilir. Qapılar hələ də hərəkətin əksi istiqamətinə açılır və şirkət qapılarda da yeniliyə imza atıb. Hər bir qapının uzunluğu 1,5 metrə çatır. Standart təkər diskləri isə 23 düymdür.
Yeni elektromobilin salonu benzin mühərrikli müasir Rolls-Royce modellərinin salonuna oxşar şəkildə tərtib olunub. Cihazlar paneli virtualdır, lakin şirkətin digər modellərində də artıq belə cihazlar paneli var. Elektromobilin salonunu bəzəyən ulduz dekorunu təkcə tavan üçün deyil, həm də qapılar və yan divarlar üçün də sifariş etmək olar. Elektromobil müasir Phantom, Ghost və Cullinan modellərinin “Dəbdəbə Arxitekturasına” əsaslanır. Maraqlıdır ki, daxili yanma mühərriklərindən elektrik mühərriklərinə keçid avtomobildə istifadə olunan elektrik naqillərinin ümumi uzunluğunun 2 kilometrdən 7 kilometrə qədər artmasına səbəb olub.
Spectre modelinin texniki xüsusiyyətləri
Rolls-Royce Spectre elektromobili 4 elektrik mühərriki ilə təchiz olunmuşdur. Bu elektrik mühərrikləri 585 at gücü və 900 Nm fırlanma qüvvəsi hasil edir. Boş çəkisi 2975 kiloqram olan elektromobil, 100 km/saat həddinə 4,5 saniyə ərzində çata bilir. Bütün bu göstəricilər dəyişə bilər, çünki bu günə qədər test proqramının cəmi 55%-lik hissəsi tamamlanıb və qarşıda tənzimləmə mərhələləri var.
Yeni elektromobilin qiyməti təxminən 275.000 funt-sterlinqdən başlayacaqdır. Elektromobilin tədarükünə isə 2023-cü ilin dördüncü rübündə başlanılacağı deyilir.
