Opel şirkəti bu gün keçirdiyi təqdimat tədbirində yeni elektrikli modelini anons etdi. Belə ki, Alman avtomobil istehsalçısının yeni elektrikli modeli Opel Astra Electric-dir. 1991-ci ildən bazarda olan Opel Astra seriyası, alman avtomobil istehsalçısının ən çox tanınmış modelidir. Bu gün isə şirkət, ən çox tanınmış seriyasına yeni elektrikli model əlavə edib. Qeyd edək ki, hazırda Opel astra seriyasının benzin, dizel və hibrid variantları mövcuddur.
Opel Astra Electric modeli hansı xüsusiyyətlərə malikdir?
Opel şirkəti yeni elektrikli modelini, hetçbek və universal kuzov versiyaları ilə təklif edir. Qeyd edək ki, yeni elektromobilin dizaynına nəzər saldıqda ənənəvi Opel Astra modellərinin dizaynının davam etdiyini görə bilərik. Hətta elektromobil seriyanın digər modellərindən dizayn olaraq fərqlənmir demək mümkündür. Bu modeldə də 18 düymlük təkər disklərindən istifadə edilib, lakin diskin dizaynı elektromobilə futuristik görünüş qatır. Elektromobilin interyerində isə bəzi təkmilləşdirmələr edilib. Belə ki, interyerə nəzər saldıqda 10 düymlük cihazlar paneli bizi qarşılayır. Elektromobilin cihazlar panelindən müasir texnologiyalarını idarə etmək mümkündür.
Texniki cəhətdən isə yeni Opel Astra Electric modeli, ön oxda yerləşən 1 elektrik mühərriki ilə təchiz edilib. Elektromobilin elektrik mühərriki 156 at gücü və 270 nm fırlanma anı hasil edir. Əlavə olaraq qeyd edək ki, elektromobil 3 mühərrik hərəkət rejiminə sahibdir. Uyğun olaraq Sport, Normal və Eco rejimləri mövcuddur. Ən yüksək gücü isə məhz Sport rejimində verə bilir. Qeyd edək ki, elektromobilin maksimal sürəti 170 km/saat ilə məhdudlaşdırılıb.
Elektromobilin əsas xüsusiyyəti olan batareyasına nəzər saldıqda batareyanın 54 kVts tutuma malik olduğunu görürük. Şirkət elektromobilin tam dolu şarj ilə 416 km məsafə gedə bildiyini iddia edir. Həmçinin sürətli şarj dəstəkləyən elektromobil 100 kVt şarj ilə 26 dəqiqəyə 80% batareya toplaya bilir.
Şirkət, Opel Astra Electric hetçbekinin 2023-cü ilin yayı, universalını isə 2023-cü ilin sonuna qədər bazara çıxarılacağını bildirib. Qeyd edək ki, yeni modelin başlanğıc qiymətinin 40 min dollar olması gözlənilir.
