Dünyanın ən qabaqcıl avtomobil brendlərindən biri olan Mercedes-Benz daim yenilikləri ilə rəqiblərini ötə bilib. Bu dəfə isə Mercedes-Benz avtomobillərinə ChatGPT süni intellekt texnologiyasını əlavə edir. Beləliklə süni intellekt texnologiyaları artıq avtomobil sənayesində də geniş istifadə olunacaq. Alman avtomobil nəhənginin bu yeniliyi gələcəkdə digər avtomobil brendlərinin də ChatGPT bənzəri süni intellekt texnologiyalarını avtomobillərinə əlavə etməsinə səbəb ola bilər. Qeyd edək ki, yenilik sadəcə ABŞ-dakı Mercedes-Benz avtomobillərinə aid olacaq.
Belə ki, ABŞ-da yaşayan Mercedes-Benz avtomobili sahibləri bu gündən etibarən beta proqramına qoşularaq ChatGPT funksiyasının aktivləşdirə bilər. Yeni ChatGPT funksiyası brendin MBUX media və əyləncə sisteminə əlavə olunub. Bu isə o deməkdir ki, avtomobilin rəqəmsal köməkçisinin nitq qabiliyyəti daha da təkmilləşəcək. Qeyd edək ki, artıq “Hey Mercedes, mən beta proqramına qoşulmaq istəyirəm” deyərək avtomobildən heç bir tətbiqə daxil olmadan Beta versiyaya qoşulmaq mümkündür.
Mercedes-Benz brendinin avtomobillərinə ChatGPT funksiyasını əlavə etməsi bəzi istifadəçilər üçün əla bir yenilik hesab olunsa da bəziləri üçün çox lazımsız hesab olunur. Ümumiyyətlə sürücü avtomobili idarə edərkən media və əyləncə sistemlərinə çox baxdıqda və ya fikri bu sistemlər ilə dağıldıqda qəza qaçınılmaz olur. İndi isə ChatGPT kimi “yazı əsaslı” çatbot isə çox geniş əhatəyə malik olan süni intellekt texnologiyasının əlavə edilməsi bu qəzaların sayını ciddi dərəcədə artıra bilər. Mercedes isə bu problemi səsli əmr funksiyaları ilə həll etdiyini iddia edir. Belə ki, artıq rəqəmsal köməkçi sadəcə əmrləri qəbul etməyəcək, həm də sizinlə söhbət edəcək. Yeniliyin nə zaman bütün modellər üçün əlçatan olacağı isə məlum deyil.
