Karbon yanacaqlı vasitələrdən uzaqlaşmaq üçün alternativ axtarışlarda elektrikli avtomobillər ön sıralarda olsa da, gələcəkdə hidrogen mühərriki və hidrogen yanacaq hüceyrəli vasitələrin də mühüm yer tutacağını düşünənlər var. Məsələn, Toyota rəhbərliyi tez-tez bildirir ki, avtomobil sənayesinin gələcəyi hidrogen vasitələrindədir. Buna görə Toyota və Hyundai kimi bəzi şirkətlər bu sahəyə əhəmiyyətli investisiyalar qoyurlar. Bununla belə, bu avtomobillərin yüksək yanacaq qiyməti onların ən böyük maneəsi olaraq qalır. Hətta, yeni ortaya çıxan məlumata görə, Hidrogen ilə işləyən avtomobil sürmək, elektromobil sürməkdən 14 dəfə bahadır.
Hydrogen Insight tərəfindən paylaşılan məlumatlara görə, hidrogen vasitələrinin geniş istifadə olunduğu azsaylı bölgələrdən biri olan Kaliforniyada hidrogen vasitəsindən istifadənin dəyəri orta elektriklə işləyən nəqliyyat vasitəsinin istifadə xərcindən 14 dəfə yüksəkdir. Hidrogen vasitəsi sahibləri hazırda Toyota ilə məhkəmədədir. Çünki, hidrogen ilə işləyən Toyota Mirai alarkən onlara verilən vədlərin tutulmadığını düşünürlər. Zamanla artacağı deyilən hidrogen yanacaqdoldurma məntəqələrinin sayı isə əksinə gün keçdikcə azalıb.
Kaliforniyada hidrogen yanacaqdoldurma məntəqələri quran şirkətlərdən biri olan Shell, tez-tez sıradan çıxan bu stansiyalardan əhəmiyyətli miqdarda pul itirdiyi üçün stansiyaları bağlamaq qərarına gəlib. Shell stansiyalarını bağlayanda onsuz da az olan yanacaqdoldurma məntəqələrinin sayı daha da azalıb. Bu məqamda hidrogenlə işləyən avtomobil sahibləri indi hətta şəhər ətrafında avtomobil sürərkən də yanacaq problemi yaşayırlar. Çünki bütün ştatda cəmi 53 yanacaqdoldurma məntəqəsi var. Bu 56 stansiyadan 37-si True Zero tərəfindən idarə olunur. “True Zero” şirkəti bu yaxınlarda hidrogen yanacağının qiymətini yenidən artıraraq, hidrogen yanacağının kiloqramının qiymətini 30 dollardan 36 dollara qaldırıb. Ancaq sonuncu dəfə kiloqramın qiyməti 21 dollar idi.
2021-ci ilin aprel ayında Kaliforniyada hidrogen yanacağının orta qiyməti kiloqramı üçün 12 dollar təşkil edib. Vaxt keçdikcə azalacağı gözlənilən yanacağın qiymətinin 4 ildə 3 dəfə artması bu avtomobillərin gələcəyi ilə bağlı suallar yaradır. Hazırda Kaliforniyada ən məşhur hidrogen avtomobili olan Toyota Mirai-nin 12 funt (5,6 kiloqram) yanacaq çənini doldurmaq təxminən 201 dollara başa gəlir. Bu o deməkdir ki, Mirai 2 mil (3,2 km) üçün orta hesabla 1 dollar yanır ki, bu da Toyota tərəfindən elan edilən maksimum məsafədir. Gündəlik istifadədə demək olar ki, heç kim bu həddə çata bilmədiyi üçün hər km üçün yanacağın qiyməti daha da artır. 2 mil üçün 1 dollar fərz etsək belə, bu, Tesla-nın Kaliforniyadakı Supercharger-dan doldurarkən istifadə etdiyi yanacaq miqdarından təxminən 14 dəfə çoxdur.
