2026-cı ildə qüvvəyə minəcək yeni texniki reqlamentlərlə Formula 1-də tamamilə fərqli bir dövr başlayır. Avtomobilin strukturundan tutmuş mühərriklərinə qədər bir çox sahədə inqilabi yeniliklər tətbiq olunacaq. Beləliklə, aparılan bu dəyişikliklərlə yeni nəsil Formula 1 avtomobilləri düz yollarda 400 km/saata çata biləcək.
Sürətin artırılması daha güclü elektrik mühərrikləri və təkmilləşdirilmiş aktiv aerodinamik sistemlər hesabına mümkün olacaq. Mercedes komandasının rəhbəri Toto Wolff sürət potensialını vurğulayaraq, “Tam gücdə demək olar ki, 400 km/saata çatırıq” deyə bildirib. Aston Martin-in ehtiyat pilotu Felipe Drugoviç, “Avtomobil döngələrin çıxışlarında o qədər sürətlə işə düşür ki, sanki raketin üzərində oturmuş kimi hiss olunur” deyə bildirib.
FİA-nın məlumatına görə, 2026-cı il model avtomobillər indiki modellərdən daha qısa, ensiz və yığcam olacaq. Ön və arxa qanadların dizaynı dəyişdiriləcək, bəzi hissələr tamamilə aradan qaldırılacaq, aktiv aerodinamik sistemlər isə düz yollarda hava müqavimətini xeyli azaldacaq. Güc aqreqatında da əhəmiyyətli dəyişikliklər var. Daxili yanma mühərriki 575 at gücü, elektrik mühərrikləri isə 475 at qüvvəsi hasil edəcək. Bu kombinasiya avtomobilləri Formula 1 tarixində ən yüksək fırlanma anı ilə təmin edəcək. Ancaq bu sürət artımının bir bahası var. Aşağı enmə qüvvəsi və daha dar təkərlərin istifadəsi səbəbindən döngə sürətləri aşağı olacaq, lakin sürücülər enerjinin idarə edilməsi və batareya strategiyasına daha çox nəzarət edəcəklər. Bu, yarış taktikasında yeni eranın başlanğıcı deməkdir. Formula 1-də ən yüksək sürət rekordu 2016-cı il Azərbaycan Qran Prisində Valtteri Bottas tərəfindən 378 km/saatla müəyyən edilib.
