İstifadə etdiyimiz bir çox elektrikli cihazlar portativ (daşınan) istifadəyə uyğun olması üçün mütləq şəkildə batareyalar ilə təchiz edilir. Batareya texnologiyaları inkişaf edib, enerji sərfiyyatı azaldıqca da sadə smartfonlardan tutmuş, ən böyük batareyaları özündə birləşdirən elektromobillərə qədər effektivlik xeyli yüksəlir. Lakin digər sadə cihazlardakı batareyaları, elektromobillərdə nəhəng batareya paketlərindən ayıran bir çox nüans var. Bunlardan ən sadəsi batareyanın tükənməsi mövzusudur. Məsələn, smartfonunuzun batareyası 1%-ə yaxınlaşıbsa nadir hallarda bildiriş panelində 0% rəqəmini görə bilərsiniz. Çünki, smartfon 0% rəqəmini sizə göstərmədən qapanacaq. Elektromobillərdə isə vəziyyət biraz fərqlidir. Digər texnoloji cihazlardan fərqli olaraq elektromobillər nəqliyyat vasitəsi kimi daha çox “məsuliyyəti” özündə cəmləyir. Nəticədə batareya 0% olsa belə elektromobil hərəkət etməyə davam edə bilir. Belə ki, whatcar resursu bu mövzuya dəqiq bir cavab tapmaq üçün araşdırma edib. Beləliklə, elektromobillərin 0 faiz şarjla getdiyi maksimum məsafə məlum olub.
BMW i4 modeli 0 faiz şarjla nə az, nə çox tam olaraq 30.5 Km məsafə qət edə bilib!
Elektromobillərin batareyasını optimal saxlamaq üçün mütəxəssislər nəinki 0%, heç 15-20% aşağısına salmağı belə məsləhət görmürlər. Çünki, batareyanın həddindən artıq şarj və deşarj olması stress səviyyəsini əhəmiyyətli dərəcədə artırır. Uzun müddətli istifadədə batareyalarınızı belə yük altında istifadə etsəniz ortalama 30%-ə qədər yürüyüş məsafəsində itki ilə qarşılaşa bilərsiniz. Doğrudur, bu hesablamalara təsir edən digər faktorlar həddindən artıq çoxdur. Elə ən sadə hava temperaturu və yüksək sürətli şarj məntəqələrindən hansı sıxlıqla istifadə etməyiniz belə batareya ömründə müəyyən təsirlər yarada bilər. Gəlin, bunları kənara qoyub elektromobillərin 0 faiz şarjla nə qədər məsafə qət etdiyinə yaxından nəzər salaq.
Whatcar tərəfindən test edilən elektromobillərin siyahısına BMW i4 modeli başçılıq edib. Bu model 508 Km getdikdən sonra batareya 0% olduğunu göstərib. Lakin əsas test bu hissədə başlayıb və BMW i4 modeli 0% şarjla 30.5 Km məsafə qət etməyi bacarıb.
Test edilən digər 9 model isə batareya 0% olduqdan sonra uyğun olaraq aşağıda qeyd edilən qədər məsafə qət etməyi bacarıb.
- Kia Niro EV – 27.3 km
- Volvo XC40 Recharge – 27.3 km
- Volkswagen ID.5 – 24.1 km
- Kia EV6 – 20.9 km
- MG ZS EV – 20.9 km
- Tesla Model 3 – 20.9 km
- Tesla Model Y – 17.7 km
- Cupra Born – 16 km
- BMW iX3 – 8 km
Whatcar bildirir ki, hər şey testlərin düzgün edilməsi üçün lazımi şəkildə nizamlanıb. 10 elektromobil də tam şarj edilib və 15 saat çöldə saxlanılıb. Daha sonra yerində boşalan batareyalar təkrar tam doldurulub. Hərəkətə başlamamışdan əvvəl isə havalandırma sistemi 21 dərəcəyə təyin edilib. Sonda isə test müddətində elektromobillərin bütün aerodinamik təsirləri nəzərə alınaraq, normal nəqliyyatdakı dayanma halları da simulyasiya edilərək testlər aparılıb. Hava temperaturu 24-29°C arasında dəyişib. Maraqlıdır ki, 0% şarjla ən az gedən elektromobil də elə BMW brendinin iX3 modeli olub.
