SpaceX peyk interneti xidməti Starlink əhatə dairəsini genişləndirməyə davam edir. Belə ki, şirkət Starlink Aviation adlı yüksək sürətli peyk internet xidmətini artıq təyyarələrə də təklif edəcək. Artıq təyyarələrdə onlayn oyunlar oynamaq və ya digər yüksək sürətli internet fəaliyyətlərini həyata keçirmək mümkün olacaq. Starlink Aviation xidməti Aero Terminal xüsusiyyəti ilə təchiz olunmuş istənilən təyyarəyə 350 Mbit/s-ə qədər internet sürəti təklif edə biləcək. Hal-hazırda təyyarələrdə mövcud olan internet xidmətini nəzərə alsaq, yeni Aviation internet xidmətinin ciddi yenilik gətirdiyini söyləmək mümkündür. Bu internet xidmətinin köməyi ilə, gələcəkdə aviaşirkətlər sərnişinlərə yüksək internet təklif edə bilər.
Starlink Aviation peyk internet xidmətinin xüsusiyyətləri sadəcə yüksət sürət ilə məhdudlaşmır. SpaceX şirkətinin verdiyi məlumata görə, internet bağlantısı ümumi uçuş prosesi zamanı 20 ms gecikmə ilə işləyəcək. Digər tərəfdən, Starlink peykləri yer orbitinin aşağı hündürlüyündə hərəkət etdiyi üçün qlobal əhatə dairəsindən də rahatlıqla yararlana biləcəjlər. Məhz bu səbəbdən Aviation internet xidməti ilə təchiz olunmuş bütün təyyarələr, dünyanın hər yerində yüksək internət sürətinə malik olacaqlar.
Əgər Starlink Aviation həqiqətən SpaceX-in vədlərini yerinə yetirə bilsə, hər bir təyyarə üçün 100 Mbps-ə qədər internet sürəti təklif edən digər peyk xidmətlərindən daha sürətli və daha ucuz olacaq. Şirkət iddia edir ki, internet xidməti sərnişinlərə video zənglər etmək, onlayn oyunlar oynamaq kimi uçuş zamanı edə bilməyəcəkləri işləri görməyə imkan verəcək.
SpaceX-in Starlink Aviation xidməti üçün verilən tarix 2023-cü ilin ortasıdır. Bununla belə, artıq aviaşirkətlərlə müqavilələr bağlanıb. Bir neçə ay əvvəl, sınaq uçuşu edən JSX aviaşirkəti Starlink peykləri ilə təyyarəsində 100 Mbps internet sürətinə çata bildiyini açıqlamışdı. JSX həmçinin Starlink Aviation xidmətini əldə edən ilk aviaşirkətlərdən biri olacaq. Həmçinin, Hawaiian Airlines-ın da SpaceX ilə müqaviləsi var. Təyyarələrdə internet xidmətinin göstərilməsinin ənənəvi qiymətini nəzərə alsaq deyə bilərik ki, aviaşirkətlərin Aviation xidmətinə tələbləri yüksək ola bilər.
