USB texnologiyasının inkişafı və mənimsənilməsini təşviq edən qeyri-kommersiya təşkilatı olan USB Implementers Forum (USB-IF) yeni USB4 standartının 2.0 spesifikasiyasının buraxıldığını elan edib. USB4 ilk versiyası 2019-cu ildə təqdim edilmişdi. 2019-cu ildə təqdim olunmuş ilk versiya, əvvəlki USB 3.2 variantından 2 dəfə sürətli olan 40 Gb/san ilə məlumat ötürməyə imkan verirdi. Üç il keçdikdən sonra yeni versiyada da sürət 2 dəfə artıb. Belə ki, yeni versiya 80 Gb/san sürətlə məlumat ötürməyə imkan versədə, bu rəqəm 120 Gb/san-ə arta bilər.
Yeni USB4 standartının əsas xüsusiyyətləri
Hal-hazırda mövcud olan və bir çox şirkət tərəfindən istifadə olunan USB-Type C texnologiyası 40 Gb/san sürətlə məlumatları ötürə bilir. Lakin bu sürət yeni USB4 standartı sayəsində 120 Gb/san-dək qalcaxaq. Həmçinin yeni DisplayPort 2.1 ilə uyğunluğu özündə ehtiva edən USB4 2.0 standartının xüsusiyyətlərinə, video sıxılmasına ehtiyacı olmadan 240Hz yeniləmə tezliyində 4K təsvir ölçüsünə və ya 60Hz yeniləmə tezliyində 10K təsvir ölçüsünə malik ekranlara çıxışı təmin etmək də daxildir. Bununla belə yeni texnologiya, USB4-ü dəstəkləyən istənilən cihaza 240 Vt-a qədər enerji verə bilər. Bu isə öz növbəsində gələcəkdə təqdim olunacaq cihazların yüksək sürətli şarj imkanına malik olmasına imkan verir.
USB4 2.0 standartı, əlbəttə ki, USB4 1.0 , USB 3.2, USB 2.0 standartları ilə də uyğun olacaq. Yeni texnologiyanın təfərrüatları hələ açıqlanmayıb, lakin USB Promoter Group təfərrüatları noyabr ayında keçirilməsi planlaşdırılan USB DevDays tədbirlərindən əvvəl açıqlayacağını deyir. Yeni texnologiyadan istifadə edəcək cihazların gələn il təqdim olunacağı gözlənilir.
