Demək olar ki, bütün internet brauzerlərində mövcud olan gizli pəcərə funksiyası, istifadəçilərə internetdə heç bir “iz” qoymadan gəzməyi vədd edir. Bəs bu gizli pəncərə funksiyasının sizi nədən qoruduğunu və ya qorumadığını bilirsinizmi? Aparılan araşdırmalara görə istifadəçilərin əksəriyyəti gizli pəncərənin nə işə yaradığını dəqiq bilmirmiş. Eyni zamanda Google başda olmaqla bir çox şirkətin, gizli pəncərəni qara ekranda “eynək və papaqla” üzünü gizlətmiş adam konsepti ilə insanları manipulyasiya etdiyi də müzakirəyə çevrilib.
“Google” şirkətinin işçiləri belə gizli pəncərə funksiyası ilə məzələnirlər
Bir çox internet istifadəçisi, internetdə gəzərkən gizli pəncərədən istifadə edir. Çikaqo Universitetində aparılan araşdırma göstərir ki, istifadəçilər bu funksiyanı yanlış qiymətləndirirlər. Anketə görə istifadəçilərin 40%-i gizli rejimin onları yerinə gizlətdiyini düşünür. Digər 37%-i isə hesab edir ki, bu rejim onların internetdən istifadə məlumatlarını iş yerində, şirkətdə və.s gizlədə bilir. 22,6% isə qəribə də olsa hökumətdən qorunmaq və gizli şeyləri araşdırmaq üçün bir üsul olduğu fikrindədir.
İlk öncə onu qeyd etmək lazımdır ki, bütün brauzerlərin fəaliyyəti anonim deyil. Google, Facebook və bir sıra reklam şirkətləri ən yaxşı təklifi vermək və məhsullarını satmaq üçün internet istifadəçilərinin hər klikini izləyir. Brauzer fəaliyyəti isə digər tərəfdən, internet provayderləri tərəfindən daim izlənilir. Onlar, brauzerlərdə yaradılan məlumatları təhlil edirlər. İnternet istifadəçilərini izləyən digər tərəf isə dövlətlərdir. Dövlət terror, cinayət və bir sıra qanunsuz fəaliyyəti aşkar etmək üçün internet vasitəsilə göndərilən məlumatı izləyə bilər.
Əgər gizli pəncərə funksiyası bizi üçüncü tərəfin izləməsinin qarşısını almırsa, onda gizli rejimin iş prinsipi nədən ibarətdir? Brauzerlər gizli rejimin istifadəçilərin şəxsiyyətini gizlətdiyini, məlumat toplayanları blokladığını və ümumilikdə internetdə gəzintini daha təhlükəsiz etdiyini iddia edir. Ancaq bu rejim iddia olunanlardan sadəcə bir neçəsini edə bilir. Google Chrome brauzerində gizli rejim o brauzer istifadəçisinin baxış tarixçəsini və ya vebsaytlara daxil etdiyi məlumatları yaddaşda saxlamır. Firefox və Mozilla brauzerlərinin də oxşar şəkildə işlədiyini deyə bilərik. Buna görə də bilməlisiniz ki, internet brauzerlərində gizli pəncərə funksiyasından istifadə etmək, sizi “görünməz insan” etmir.
Bloomberg tərəfindən verilən məlumata görə 2018-ci ildə Google mühəndisləri də yaranmış məhkəmə prosesində gizli pəncərə ilə bağlı vacib bir təklif veriblər. Onlara görə gizli pəncərinin adını dəyişib, cəsus görüntüsündə adam simgəsindən də imtina etmək lazımdır. Brauzerin bu cür dizaynı insanlarda bu funksiya ilə bağlı yanlış fikirlər yaratmağa səbəb olur. Google şirkəti isə dəyişiklikdən imtina edib. Yenidən bu mövzu gündəmə gəldiyi üçün, işçilər təkrar bu xüsusiyyətlə məzələnməyə başlayıblar.
