Son dövrlərdə hamının həyatının bir hissəsinə çevrilən ağıllı saat və qolbaqların hər il yeni modelləri təqdim olunur. İnsanlar ağıllı qolbaqlardan əsasən gün ərzində nə qədər hərəkət etdiyini öyrənmək üçün istifadə edirlər. Lakin bu hərkəsə şamil olunmur. Müasir dövrdə ağıllı saatların inkişafı istifadəçilərə demək olar bütün imkanları verir. Məsələn, siz bu saatlar vasitəsilə həm danışa, həm səs yaza, həm bir çox idman hərəkətlərinizi idarə edə, hətta ölkəmizdə mümkünlüyü çətin olsa da ödəniş edə bilirsiniz. Bu məqaləmizin əsas mövzusu 150 manata ala biləcəyiniz 5 ən yaxşı ağıllı saat və qolbaq olacaq.
Xiaomi Band 7 Pro
Ötən aylarda təqdim olunmuş Xiaomi (Smart) Band 7 Pro, 5 ən yaxşı ağıllı saat və qolbaq barədə olan siyahımızın ilk sırasındadır. Ağıllı qolbağın görünüşcə Redmi Smart Band Pro və ya Honor Band 6 modellərinə bənzədiyini deyə bilərik. Cihaz Xiaomi Band 7 modelindən fərqli olaraq kvadrat ekrana malikdir. Bu xüsusiyyətinə görə də cihazın AMOLED ekran paneli biraz daha böyüyüb. Xiaomi cihaza parlaqlığı avtomatik tənzimləyən sensor da əlavə etmişdir. Always On Display rejimi və 180-dən çox yeni saat arxa planı bu cihazı digər Band modellərindən fərqləndirən əsas xüsusiyyətdir. İstifadəçilər müxtəlif kəmər seçimləri sayəsində ağıllı qolbağın görünüşünü dəyişə biləcəklər. Yenilənmiş dizayn və böyüdülmüş ekranla yanaşı, cihaz GPS funksiyasını da özündə birləşdirib. Belə ki, Band 7 modelindən daha böyük ekranı 1.64 düymdür. Ümumiyyətlə, Mi Band tarixinin ilk “Pro” modeli məhz bu cihazdır. Xiaomi (Smart) Band 7 Pro modelinin cari qiyməti Aliexpress üzərində 55–70 dollar arasında dəyişir (93-120 manat). Bu qiymət isə Xiaomi Band 7 Pro modelinin Çin üçün çıxarılmış variantına aiddir. Qlobal variantı isə 70-90 dollar arasında dəyişir. Texniki cəhətdən qlobal variantında NFC dəstəyi yoxdur, lakin türk dilini və.s dəstəkləyir. Çin variantı isə NFC dəstəyinə malikdir, lakin qeydlərə görə interfeysi yalnız ingilis və Çin dillərini dəstəkləyir. Lakin hər iki variantı arasında ümumilikdə heç bir fərq yoxdur.
Huawei Band 6
Çinin texnologiya nəhəngi olan Huawei 2019-cu ildə təqdim etdiyi Huawei Band 4-ün davamçısı olaraq Huawei Band 6 modelini elan etmişdi. Huawei Band 6 modeli 194 x 368 piksel təsvir ölçülü 1,47 düymlük AMOLED ekran üzərində qurulub. Cihaz sələfi Band 4 ilə müqayisədə 148% daha böyük, olduqca nəhəng ekrana sahibdir. Sol tərəfində fiziki düyməsi olan Huawei Band 6-nın çəkisi 18 qram təşkil edir. Cihaz normal istifadədə 14 günə qədər batareya ömrü verir. Həmçinin 5 dəqiqəlik şarjla 2 gün istifadə imkanı təqdim edir. Bu cihaz da digər smart qolbaqlar kimi ürək döyüntüsü, yuxu izləmə, qanda oksigen və digər xüsusiyyətlərə malikdir. Bəzi variantılarında təmassız ödəniş üçün NFC dəstəyini ehtiva edən ağıllı qolbaq həm də zənglər və mesajlar kimi bildirişlərin göstərilməsi, musiqiyə nəzarət kimi funksiyalara malikdir. Bu cihazı isə 50 dollar(85 manat) ödəyərək əldə edə bilərsiniz. Ölkəmizdə də münasib qiymətə araşdırma edərək cihazı əldə etməyiniz mümkündür.
Xiaomi Band 7
Siyahımızın ikinci yerində yenə Xiaomi şirkətinə məxsus olan Band 7 ağıllı qolbağı dayanır. Xiaomi Band seriyası Band 7 və Band 7 Pro modellərinə kimi 140 milyon nüsxə sataraq əhəmiyyətli bir uğur qazanıb. Bu rəqəm onu göstərir ki, Xiaomi smart saat və qolbaq sahəsində önəmli mövqeyə sahibdir. Xiaomi Band 7 smart qolbağı 1.62 düymlük AMOLED ekran panelinə malikdir. Bu ekran ölçüsü Band 6 modelindən 25% daha çoxdur. Digər Band modellərində olduğu kimi bu cihaz da ürək döyüntüsü, yuxu izləmə, qanda oksigen, stress izləmə kimi xüsusiyyətlərə malikdir. Həmçinin cihaz qandakı oksigen səviyyəsi müəyyən səviyyənin altına düşdükdə xəbərdarlıq edir. 50 metrə qədər suya davamlı olan qolbağın GPS funksiyası yoxdur. Xiaomi Band 7 modelinin qiyməti Aliexpress üzərində 38–46 dollar arasında dəyişir (65-80 manat). Lakin Azərbaycanda bu cihazı ortalama 100 manata əldə edə bilərsiniz.
OnePlus Nord Watch
OnePlus brendi son illər ərzində Nord brendini təsis etdikdən sonra öz məhsul çeşidliliyini genişləndirməyə davam edir. Belə ki, şirkət ötən günlərdə Nord seriyasının ilk ağıllı saatı olan OnePlus Nord Watch modelini təqdim edib. On Plus Nord Watch haqqında olan xəbərimizdə qeyd etmişdik ki, bu cihaz Xiaomi şirkətinin Band 7 Pro modeli ilə rəqabətə girə bilər. Təxminimiz bu gün öz təsdiqini tapdı. Düzbucaqlı formasında olan gövdəsi ilə ideal nazikliyə və 35,6 qram çəkiyə sahibdir. 1.78 düymlük AMOLED ekran panelinə sahib cihazın ekranı 60Hz görüntü yeniləmə tezliyinə malikdir. İstehsalçı tərəfindən verilən məlumata görə enerji qorunması rejimində 30 günə qədər istifadə edilə bilən OnePlus Nord Watch modeli 230 mAs batareyaya sahibdir. Cihazı Azərbaycandan əldə etmək hələ mümkün olmasa da növbəti həftələrdə əlçatan ola bilər. Belə ki, ağıllı saat hal-hazırda Hindistanda 60 dollar(102 manat) ilkin sifariş qiyməti ilə təklif edilir. Qiyməti və texniki xüsusiyyətlərinə görə çox uğurlu modellərdən biridir.
Amazfit Bip 3
150 manata ala biləcəyiniz 5 ən yaxşı ağıllı saat və qolbaq siyahısının sonuncu yerində isə Amazfit Bip 3 dayanır. Amazfit, Xiaomi şirkətinin ağıllı saat istehsal edən şirkətidir. Amazfit Bip 3 modeli 60-dan çox məşq rejimi, yuxu keyfiyyəti və stress izləmə funksiyalarına mailkdir. Bu cihaz da, siyahıda olan digər cihazlarla eyni funksiyaları yerinə yetiri. Həmçinin cihazda GPS fuksiyası mövcuddur. Qolbaq 280 mAs batareyaya sahibdir. Amazfit Bip 3 ağıllı qolbağını 60 dollara (102 manat) əldə edə bilərsiz. Lakin digər modellər ilə müqayisədə sadəcə alternativ ola bilər.
Nəticə nədir?
5 ağıllı saat və qolbaq arasında ən çox sevil’n model təxmin edə biləcəyiniz kimi OnePlus Nord Watch və Band 7 Pro modelləridir. Belə ki, sadalanan modellərin qiymətləri bir-birinə yaxın olduğu üçün Xiaomi Band 7 Pro modeli daha məntiqli seçim olacaq. Sizə bu modeli Aliexpress üzərindən almağı münasib olması cəhətdən tövsiyə edirik. Cihazların ölkəmizə gətirilmə xərcini (təxminən 3-4 dollar) və gözləməli olduğunuz vaxtı nəzərə almağınızda da fayda var. Lakin seçim yenə də öz əlinizdədir. Normal ağıllı saatlara bənzəyən, keyfiyyətli və münasib bir cihaz kimi bir neçə ay gözləyib OnePlus Nord Watch modelini də əldə etmək məntiqli ola bilər. Xüsusilə qiyməti, ölçüsü və ölkəmizdə əlçatan olmasına görə ən maraqlı seçim isə Huawei Band 6 modelidir.
