İndiyə qədər ən azından 1 dəfə də olsa smartfonunuzdakı Google assistent və ya Siri səsli köməkçilərindən yəqin ki, istifadə etmisiniz. Bu səsli köməkçilər, həmçinin səsli mesajların mətnə çevrilməsini təmin edən xüsusiyyətlər Azərbaycan dilini heyif ki, dəstəkləmir. Azərbaycan dilinin səsli formada yaxın illər ərzində Google və Apple tərəfindən dəstəklənməsi də inandırıcı görünmür. Lakin İngilis, Alman, Türk dillərindən süni intellekt ilə səs və videonu yazılı mətnə çevirən Voicedocs platforması Azərbaycan dilini də peşəkar formada dəstəkləməyə başlayır.
INNOLAND rezidenti Voicedocs, danışığın avtomatik yazıya çevrilməsi texnologiyalarının və bu texnologiyalara əsaslanan onlayn servis tətbiqlərinin hazırlanması ilə məşğul olur. Rauf Fətullayev və Orxan Fətullayevin təsisçisi olduğu Voicedocs startap kimi ilk dəfə 2015-ci ildə Almaniyada qeydiyyata alınıb. Platformanın maşın öyrənməsi tərəfində Rauf Fətullayev, proqram təminatının hazırlanmasında Orxan Fətullayev, məzmun və SEO tərəfində isə Məcid Məcidov fəaliyyət göstərib. Bu ilə qədər platformada ciddi təkmilləşdirmələr edən komanda yerli mütəxəssislər tərəfindən hazırlanmış, süni intellekt əsasında işləyən onlayn proqram təminatı vasitəsilə səs və videonu dəqiqələr içində mətnə çevirmə xüsusiyyətini Azərbaycan dilində də istifadəyə verib. Rəsmi veb səhifəsi üzərindən Voicedocs tətbiqini istifadə edərək səs və ya videodan mətn çıxarıb MS Word, Text və SRT (videolara alt yazı üçün format) kimi yaddaşda saxlaya bilərsiniz.
Yeni hesab açaraq Voicedocs proqramına daxil olan istifadəçi 100 dəqiqəlik pulsuz sınaq müddətindən istifadə edə bilər. Lakin daha sonra 2 saat 30 dəqiqə əlavə səs faylı uzunluğu üçün 15 manat, 10 saat səs uzunluğu üçün 50 manat ödəmək lazımdır. Maraqlı bir fakt kimi qeyd edək ki, “Azərbaycanda ilk nitqin tanınması sistemi” hesab edilən illər əvvəlin məşhur “Dilmanc” layihəsinin direktoru Əbülfət Fətullayev olmuşdur. Azərbaycan-ingilis dili maşın tərcüməsi sistemi üçün rəqəmsal modelləşdirmə metodunun işlənib hazırlanması və tətbiqi sahəsində vacib addımlar atmış Əbülfət Fətullayev, Rauf Fətullayev və Orxan Fətullayev qardaşlarının atasıdır.
