OnePlus brendi son illər ərzində Nord brendi təsis etdikdən sonra öz məhsul çeşidliliyini genişləndirməyə davam edir. Nord seriyası daxilində büdcəvi modellərə qədər uzanan istehsal xətti ağllı aksesuarlara kimi yayılıb. Belə ki, şirkət bu gün Nord seriyasının ilk ağıllı saatı olan OnePlus Nord Watch modelini təqdim edib. Yeni nəsil ağıllı saat modeli uzun batareya ömrü, erqonomik dizaynı və ortalama qiyməti ilə diqqət çəkib.
OnePlus Nord Watch modeli qarşıdakı aylarda Xiaomi Band 7 Pro modeli ilə rəqabətə daxil ola bilər
Ağıllı saatın dizaynı olduqca yaxşı alınıb. Düzbucaqlı formalı gövdəsi ilə ideal nazikliyə və 35,6 qram çəkiyə sahibdir. 1.78 düymlük AMOLED ekran panelinə sahib cihazın ekranı 60Hz görüntü yeniləmə tezliyinə malikdir. Eyni zamanda 368 x 448p təsvir ölçüsü və 500 nit parlaqlığı ilə olduqca yüksək istifadəçi təcrübəsi yaşada bilər. Ekranın gövdə nisbəti də 70,7% təşkil edir ki, belə bir ağıllı saat üçün lazımi səviyyədə hesab edilə bilər.
İstehsalçı tərəfindən verilən məlumata görə enerji qorunması rejimində 30 günə qədər istifadə edilə bilən OnePlus Nord Watch modeli 230 mAs batareyaya sahibdir. Daxili GPS dəstəyinə malik olmasa da Bluetooth 5.2 dəstəyi ilə smartfonunuza bağlanaraq GPS məlumatlarını əldə etməsi mümkündür.
Nəbzin ölçülməsi, qanda oksgien səviyyəsinin təyini, yuxu analizi, qadınlarda periodik dövrün hesablanması, stress səviyyəsinin təyini kimi sağlamlıq xüsusiyyətlərinə malikdir. 105 ədədə qədər idman növünün dəstəkləyən saat toz və su qorunması tərəfində IP68 sertifikatına malikdir. OnePlus xüsusilə qeyd edir ki, ağıllı saatın gövdəsi hipallergik tərkibli materialla örtülüb və dəridə qətiyyən hansısa mənfi təsir yarada bilməz. Eyni zamanda ötən il OnePlus Watch modeli üçün hazırlanan qayışın eynisi OnePlus Nord Watch modelinə quraşdırılıb. Nəticədə qolunuza təmas edən materialın keyfiyyəti qətiyyən azalmayıb.
Ağıllı saat hal-hazırda Hindistanda 60$ ilkin sifariş qiyməti ilə təklif edilir. Başlanğıc qiymətin 60$ olması, bir neçə ay sonra Nord Watch modelinin ortalama 40$ qiymət etiketi ilə əlçatan olmasına yaxşı təsir göstərə bilər. Nəticədə sabah qlobal bazara çıxarılacaq Xiaomi Band 7 Pro modeli üçün iddialı bir rəqib olması mümkündür.
