Reuters tərəfindən paylaşılan hesabat ciddi maraq doğurub. Binance kriptovalyuta birjasının istifadəçi məlumatlarını ötən il Rusiya ilə paylaşdığı iddia edilib. Lakin kriptovalyuta birjası isə bu iddiaları yalanlayıb.
Kriptovalyutaların son illərdə məşhurlaşması səbəbilə daha da böyüyən Binance şirkəti yaxın zamanlarda Nasist iddiaları ilə gündəmə gəlmişdi. İndi isə şirkətin istifadəçi məlumatlarını Rusiya ilə paylaşması iddia olunur. Reuters-in paylaşdığı hesabata görə şirkətin Rusiya və Şərqi Avropa şöbələrinin rəhbəri Gleb Kostarev ötən ilin Aprel ayında “Rusiya Federasiyasının Federal Maliyyə Monitorinq Xidməti – Rosfinmonitoring” ilə görüş keçirib. Bu görüş zamanı Rusiya rəsmiləri şirkətin şöbə rəhbəri olan Gleb Kostarev-dən istifadəçilərin adları və ev adreslərini istəyib. Həmçinin, Reuters qeyd edir ki, Gleb Kostarev-in bu məlumatları paylaşmaqdan başqa çarəsi qalmayıb. Hesabatda qeyd edilən digər məlumatlara görə Rusiya dövləti bu məlumatları cinayətlərlə mübarizə aparmaq üçün istəyib. Bundan başqa Aleksey Navalni-yə aid qanunsuz bitcoin-lərin axtarışında da bu məlumatlar istifadə olunub.
Binance bu iddiaları rədd etdi!
Məşhur kriptovalyuta birjası yayılan bu məlumatlardan sonra açıqlama verərək bütün bu iddiaları rədd edib. Yayımlanan bloq yazısında xüsusilə bunlar qeyd olunub: “Binance-ın Aleksey Navalni daxil olmaqla hər hansı istifadəçinin məlumatlarını Rusiya dövlət orqanlarına verməsi ilə bağlı çıxan xəbərlər tamamilə səhvdir. Müharibədən əvvəl Binance-ın Rusiya ilə olan münasibətləri banklar və yemək restoranları kimi beynəlxalq quruluşlar ilə olan münasibətlərimizdən heç fərqlənmir.”
Son olaraq şirkət rəsmiləri qeyd edib ki, Rusiya-Ukrayna müharibəsinin başlamasından sonra tamamilə Rusiya ilə olan əlaqələrini sonlandırıb və tətbiq olunan sanksiyalara əməl etməyə başlayıb. Bloq yazısında son olaraq bu məlumatlar verilib: “Müharibə başlayan kimi Rusiya ilə olan əlaqələrimizi sonlandırdıq və sanksiyaların tələb etdiyi şərtlərə uyğun davrandıq. Bildiyim qədərilə Binance, Avropa Birliyi tərəfindən ruslara aid hesablara tətbiq edilən sanksiyaları yerinə yetirən tək kriptovalyuta birjasıdır.” Qeyd edək ki, bu platforma hal-hazırda kriptovalyuta birjaları arasında ən böyüyü və ən rəğbət görənidir. Son illərdə kriptovalyuta trendlərinin məşhurlaşması səbəbilə bu platformaya ölkəmizdə də çox ciddi maraq yaranıb.
