Bildiyiniz kimi Apple keçdiyimiz günlərdə iPhone 14 seriyasını təqdim etdi. Təqdimatdan sonra iPhone 14 seriyası nəhayət bazara çıxdı və hər zaman olduğu kimi yenə iPhone modelləri yenə istifadəçilər tərəfindən böyük maraqla qarşılandı. Vəziyyət belə olduqda isə satıcılar üçün yaşıl işıq yandı deyə bilərik. Belə ki, Apple şirkətinin yeni iPhone 14 modelləri bəzi satıcılar üçün yeni biznes mənbəyinə çevrilib. Çinli satıcılar çamadanlara yığdıqları iPhone 14 Pro modellərini ehtiyatlarının tükəndiyi mağazaların yaxınlığında baha qiymətə satmağa başlayıblar.
iPhone 14 modelləri çamadanlara yığılaraq baha qiymətə yol kənarında satılır
Belə ki, Çinli mənbələr çox maraqlı fotolar paylaşıb. Yayımlanan görüntülərdə gənc oğlanın iPhone 14 Pro ilə dolu çamadanla səkidə oturduğu görünür. Qeyd edək ki, şəkil Şenzendə rəsmi Apple Store mağazasının yaxınlığında çəkilib. Əlavə pul qazanmaq üçün yol kənarında duran satıcının çamadanında ən azı 30 ədəd iPhone 14 Pro görülüb. Bu cihazların ümumi qiyməti isə 35.000 dollardır. Eyni zamanda çamadanda başqa iPhone 14 modellərinin olduğu görünmür.
Çinli satıcılar bütün modellərin kifayət qədər tez tükəndiyi mağazalara yaxın yerlərə üstünlük verirlər və cihazları pərakəndə satış qiymətindən xeyli yuxarı qiymətə satırlar. Rəsmi satış məntəqələrində telefonların tükənməsi də onların işini asanlaşdırıb.
Hazırda Çində 1TB yaddaşa malik iPhone 14 Pro Max üçün tələb olunan əlavə ödəniş 600 dollara qədər qalxır. 128 GB yaddaşa malik variantı üçün isə daha mərhəmətli davranan satıcılar əlavə 200 dollar tələb edirlər. Apple şirkətinin rəsmi mağazalarını talan edərək başlatdıqları bu biznes modeli Çinin küçələrində böyük uğurla davam edir.
Xatırladaq ki, keçdiyimiz günlərdə iPhone 14 modelləri ilə bağlı təqdimatı sizinlə bölüşərək iPhone 14, iPhone 14 Plus, iPhone 14 Pro və iPhone 14 Pro Max modelləri haqqında bütün məlumatları sizlərə çatdırmışıq. Həmin məqaləyə səhifənin sonundan keçid edə bilərsiniz. Həmçinin bu smartfonların qiyməti, görünüş, performans, kamera, yaddaş, ekran parametrləri ilə yanaşı nəticə olaraq hansı smartfonu almağın daha sərfəli ola biləcəyini də həmin məqalədə qeyd etmişik. Bəs siz bu modellər haqqında nə fikirdəsiz? Eyni zamanda Çinli satıcıların bu biznesi haqqındakı fikirlərinizi şərhlərdə bizimlə bölüşə bilərsiniz.
