Bu gün ortaya çıxan məlumatlara əsasən, hal-hazırda Google şirkəti YouTube Premium almayan istifadəçilər üçün ardıcıl 5 ədəd qapanmayan reklamların sınaqlarına başlayıb. Artıq uzun müddətdir platformada belə reklamlar yerləşdirən şirkət deyəsən, istifadəçilərin buna öyrəşdiyini düşünür.
YouTube internetdən pul qazanmağı düşünən insanlar üçün ən yaxşı sosial medialardan biridir. Məhsul rəyləri, vloqlar, canlı yayımlar, yeməklər, avtomobillər, idmanlar, makiyajlar, oyuncaqlar və daha çox müxtəlif formatlarda hazırlanan videolarda göstərilən YouTube reklamları YouTuberların gəlir mənbələrindən biridir. Videonun əvvəlində, ortasında və ya yuxarı hissəsində görünən reklamlar yayımçının video istehsalını davam etdirməsi üçün zəruri olsa da, izləyicini bezdirə bilir. Xüsusən də hər videonun əvvəlində çıxan reklamlar narahat edicidir. Google bu reklamları o qədər şişirdir ki, müəyyən bir nöqtədən sonra platformanı dözülməz edir. Bu problemlə üzləşmək istəməyənlər Youtube Premium paketi alaraq bezdirici reklamlardan qurtula bilir.
12 saniyəlik reklamları keçə bilməyəcəksiz
Belə ki, Google YouTube Premium abunəsi olmayan istifadəçilər üçün yeni reklam modeli təklif etməyə başladı. İndi bir videoya baxmazdan əvvəl 5 reklamı izləməlisiz. Ən pisi isə odu ki, əvvəlki kimi reklamları keçə bilməyəcəksiz və izləmək istədiyiniz videodan əvvəl bütün 5 reklamı izləməli olacaqsız. Hər bir reklamın müddəti 6 saniyə olacaq, ona görə də ümumi reklam müddəti 30 saniyə olacaq. Amma daha uzun reklamların olması ilə bağlı şikayətlər də var. Hətta 10 ədədə qədər artan və ya 12 saniyəlik reklamların olduğu belə görülüb. Bu formada uzun reklamlar da hər dəfə normal olaraq YouTube Premium seçimini daha çox yadımıza salacaq. Google həm daha çox reklam göstərərək, həm öz xidmətini daha çox sataraq gəlirlərini artıracaq.
YouTube Premium almayanlar üzərində sınaq keçirilir
Yeni reklam formatı hazırda YouTube platformasını pulsuz istifadə edən istifadəçilər üzərində sınaqdan keçirilir və Premium abunəçilərinə təsir etməyəcək. Şübhəsiz ki, Google şirkətinin qəzəbləndirici reklam strategiyasının əsas məqsədi YouTube Premium-a keçməyə təşviq etməkdir. Lakin istifadəçilər bu vəziyyətdən hədsiz dərəcədə şikayətlənir və şirkətin bu qərardan geri addım atıb-atmayacağı isə sirr olaraq qalır.
Bəs siz Youtube Premium platformasından istifadə edirsiz? Fikirlərinizi şərhlər bölməsində bölüşə bilərsiz.
