Son illər sensorlu ekranlar evdəki soyuducudan tutmuş, liftlərimizdəki düymələrə qədər bir çox yerlərdə qarşımıza çıxa bilir. Texnologiyanın inkişafı ilə bu sahə həyatımıza innovativlik qatsa da bir o qədər effektiv vasitə deyil. Xüsusilə də avtomobillərdə nəhəng sensor ekranların istifadəsi axır vaxtlar geniş yayılıb. Bu cür ekranlar istifadəçiyə xoş hissiyat versə də avtomobil hərəkətdə olarkən hansısa bir funksiyaya müdaxilə etmək istəsəniz mütləq ekrana baxmalı olursunuz. Çünki, fiziki olaraq zamanla öyrəşə biləcəyiniz düymələr olmadığından gözünüzü mütləq şəkildə ekrana yönəltməlisiniz. Bununla bağlı aparılmış araşdırma göstərir ki, həqiqətən də nəhəng ekranlar hal-hazırda müasirlikdən çox potensial bir təhdidə çevrilib.
Nəhəng ekranlar və sadə düymələr arasındakı idarəyə sərf olunan vaxt, məsafə hesablanıb
Vi Bilägare jurnalı 2005-ci ildə istehsal olunmuş köhnə Volvo V70 modeli və müasir bir neçə sensor ekranlı avtomobil üzərində testlər aparıb. Nəhəng ekranların avtomobil hərəkətdə olarkən bir müdaxilə lazım olduqda problemi nə qədər vaxta həll edə bildiyi və yola baxmadığınız zaman avtomobilin nə qədər məsafə getdiyi hesablanıb. Nəticələr isə doğurdan da müasir modellərdəki ekranlar təhdidə çevrilib deməyə əsas verir.
Sürücülərə havalandırmanın temperaturunda və radioda dəyişiklik etmək, səyahət (trip) məsafəsini sıfırlamaq, oturacaq və ön şüşənin isidilməsini aktivləşdirmək tələb edilib. Bütün bu proseslər Volvo V70 modelində sadəcə 10 saniyəyə tamamlanıb. 110 Km/s sürətlə hərəkət edən avtomobil bu vaxt ərzində 306 metr yol qət edib.
Bu avtomobilin qarşısına gətirilmiş yeni nəsil MG Marvel R modeli isə siyahıda ən pis nəticəni göstərib. Sürücü bütün bu tapşırıqları yerinə yetirmək istəsə 44.6 saniyə vaxt lazımdır. Tam olaraq eyni sürətlə MG Marvel R modelində sürücünün diqqəti 1372 metr məsafə boyunca yolda olmayacaq. İkinci ən bərbad nəticə isə BMW iX modelindədir ki, tapşırıqlar üçün 30.4 saniyə vaxt və eyni sürətlə 928 metr məsafə getmək lazımdır.
IONIQ 5 modelində 26.7 saniyə, Tesla Model 3 modelində 23.5 saniyə, Volkswagen ID.3 modelində 25.7 saniyə, Dacia Sandero modelində 13.5 saniyə vaxt lazım olub. Ən yaxşı nəticələrdən biri isə yenə Volvo brendinin C40 modelində 13.7 saniyə ilə qeydə alınıb.
Nəticədə avtomobil istehsalçıları təhlükəsizlik problemlərinə görə ekranları innovativ fərqli bir yeni həllə əvəzləməyin yolunu axtarırlar. Bunun üçün 3D adaptiv düymələr hal-hazırda istehsalçılar tərəfindən test edilir.
