Batareya texnologiyaları sənayesi son illər biraz durğunluq yaşayır. Müxtəlif elektronika, elektromobil və ya sırf batareya texnologiyaları sahəsində fəaliyyət göstərən şirkətlər bu mövzuda ciddi yatırımlar edirlər. Lakin yeni batareya texnologiyalarının effektivlik, qiymət, təhlükəsizlik, davamlılıq cəhətdən seriya istehsalına uyğun vəziyyətə gətirilməsinin vaxt və qaynaq tələb etməsi işləri çətinləşdirir. Nəticədə uzun bir müddətdir ki, litium ion batareyalar ən ideal tərkib kimi batareyalarda təkmilləşdirilərək istifadə edilir. MIT mühəndisləri isə daha sürətli, ucuz və daha təhlükəsiz olması ilə fərqlənən yeni nəsil alüminium tərkibli batareya texnologiyası hazırlayıblar. Üstəlik bir neçə vacib test mərhələsindən də keçirilən alüminium batareya dizaynı əla nəticə göstərib.
Alüminium batareya texnologiyası yüksək temperaturlarda daha yaxşı işləyir, üstəlik yanıcı xüsusiyyətə də malik deyil
Litium batareyalar elə smartfonlardan bildiyimiz kimi zədələndiyi təqdirdə yanıcı xüsusiyyət göstərir. Eyni zamanda litium elementi yavaş-yavaş tükənməyə doğru gedir və qiyməti xeyli yüksəlir. Yeni nəsil batareya dizaynı alüminium, kükürd və duz olmaqla üç əsas elementi özündə birləşdirir. Nəticədə alüminium-kükürd tərkibli batareya texnologiyası qat-qat daha ucuz qiymətə başa gəlir, sürətli şarj olur və zədələnsə belə heç bir yanıcı, partlayıcı təsir göstərmir.
Belə ki, bir alüminium batareya hüceyrəsinin qiyməti litium ion batareya hüceyrəsinin qiyməti ilə müqayisədə 6 dəfə daha ucuzdur. Alüminium batareya texnologiyası temperaturdan aslılıq cəhətdən də tamamilə fərqli davranır. Yüksək temperaturu “sevən” batareya tərkibi, temperatur nə qədər yüksəkdirsə o qədər yaxşı işləyir. Alimlər qeyd edir ki, bu batareya paketi daxilindəki hüceyrələr 110°C dərəcə temperaturda, 25°C dərəcədə şarj etməyə nəzərən 25 dəfə daha sürətli şarj olur. Üstəlik batareyanı bu temperatura yüksəltmək üçün hansısa xarici bir avadanlığa (isidici) ehtiyac yoxdur.
Normal şarj və ya deşarj (istifadə) zamanı batareyanın daxili temperaturu ortalama olaraq 90-100°C ətrafında dəyişə bilir. Üstəlik isindikcə daha da yüksək effektivlik göstərən batareya 200°C temperatura qədər isidilərsə, batareyanın dəqiqələr ərzində tam doldurulması mümkündür. Bəzi testlərdə naməlum həcmli batareyanın 1 dəqiqədən də az müddətdə doldurulduğu deyilir. Batareyanın ömrü qısa olacaq desəniz, aparılan testlər eyni litium ion tərkibli batareyalar kimi Alüminium-kükürdün də 500 şarj dövründən sonra həcminin 80%-lik hissəsinin qoruduğunu göstərir.
Yeni nəsil alüminium batareya texnologiyası ilk olaraq elektromobillərin üzünü güldürür. İlk olaraq partlama və yanma təhlükəsi yoxdur, batareya paketinin soyudulması əlavə mühəndislik tələb etmir, hətta göründüyü qədərilə isidilməsini istəyir, eyni zamanda yüksək sürətli şarjı dəstəkləyir və xüsusilə də çox ucuzdur. Alüminium batareya texnologiyası “smartfonlara inteqrasiya edilə bilərmi?” sualına isə hələlik tam dəqiq cavab verə bilməyəcəyik. Qeyd edək ki, bu batareya texnologiyası artıq lisenziyalaşdırılıb və stress testlərinə hazırlanır.
