Internet dünyasında rəqəmsal kimliklərimizə sahib olmağımıza az qalıb. Hətta artıq normal brauzerlə özümüz bunu edə bilirik. Bu günlərdə internetdəki virtual kimliklərimizi ifadə edən avatarlarımız var. Özümüzə bir şəkil seçirik və onu internet dünyasında istifadə edirik. Lakin bundan sonrası üçün avatarların yetərli olmayacağını görürük. Bunun yerinə gerçək zamanlı olaraq hərəkət etdirə biləcəyimiz 3D rəqəmsal kopyalarımızdan istifadə edəcəyik. Bu kopyalara verilən ad isə MetaHuman-dir.
Öncə “Meta” termininə nəzər yetirək. Termin ilk dəfə 1986-ci ildə George R.R tərəfindən super qəhrəmanlara istinad edilmiş, sonralar isə Wild Cards romanlarında istifadə edilmişdi. Gerçəyə bənzəyən rəqəmsal xarakterlər yaratmaq olduqca çox vaxt aparan və çətin prosesdir. Bunun üçün aylarca araşdırma aparmaq, bahalı skan avadanlıqları və bu sahədə mütəxəssisləşmiş kadrlara ehtiyac duyulur. Skan avadanlıqları dedikdə nəzərdə tutulan 3D skan edə bilən cihazlardır. Məhz bu anda Epic Games tərəfindən təqdim olunan, Unreal Engine oyun istehsalı studiyası üçün yaradılmış MetaHuman Creator öz sözünü deməyə başlayır.
MetaHuman Creator sayəsində daha sürətli, daha asan, daha real görünən və ən əsası daha keyfiyyətli rəqəmsal insanlar yaratmaq mümkündür. Artıq hərkəs dəqiqələr içində bütün insani xüsusiyyətlər ilə təchiz olunmuş rəqəmsal avatarlar yarada biləcək. MetaHuman Creator-u qısa şəkildə tanıtsaq, bu proqram, hazırlanması normalda həftələr alan keyfiyyətli və real görünən rəqəmsal insanları dəqiqələr içində hazırlamağa kömək edən proqramdır.
Sistem personaj yaradıcılarının personaj hazırlamaq müddətlərini inanılmaz dərəcədə qısaldır. Öz rəqəmsal kopyanızı yaratmaq üçün bu addımları izləyə bilərsiniz. MetaHuman Creator-ı açın və Epic Games hesabınıza girin. Buradakı təlimatındakı addımları izləyin. Quixel Bridge-i quraşdırın və Epic Games hesabınızdan istifadə edərək daxil olun. MetaHuman Creator-da yaratdığınız personajlar Epic Games hesabınızla əlaqələndirilir. Beləliklə, bu personajları sosial media hesablarınızda paylaşa, yükləyə və öz proyektlərinizdə istifadə edə bilərsiniz. Qeyd edək ki, Metahuman Creator-da yaradılan modelləmələr Unreal Engine oyun motorunda istifadə edilə bilər. Bütün bunlara əlavə olaraq, başqaları tərəfindən yaradılmış personajları da öz layihələrinizdə istifadə etməyiniz mümkündür.
