Fevral ayında yeni android versiyası gözlənilən vaxtdan 6 ay əvvəl sınaq mərhələsinə daxil olmuşdu. Android 13 əməliyyat sisteminin sınaq mərhələsinə gözləniləndən daha tez daxil olması android istifadəçilərində marağa səbəb olmuşdu. Ötən gecə isə Google, dünyanın ən böyük mobil əməliyyat sistemi olan Android 13-ün ən son tamamlanmış versiyasını da gözləniləndən daha tez anons edib.
Android 13 hansı yeniliklərə malikdir
Google açıqlama verərək, Android 13 əməliyyat sisteminin bütün dəstəklənən Pixel telefonları üçün artıq yayımlanmağa başlandığını bildirib. Bu açıqlamadan sonra bütün Pixel telefonları sentyabr ayından daha tez yeni versiyanı əldə ediblər. Siyahıda olmayan Pixel 3 və Pixel 3a kimi köhnə cihazlar isə Android 12 ilə son yenilənmələrini alıblar. Digər android cihazları isə qarşıdakı həftələrdə yeni Android versiyasınl ala biləcəklər. Yeni versiyanı almağa başlayan Pixel telefonlarının siyahısı aşağıdakı kimidir:
- Pixel 4
- Pixel 4a
- Pixel 5
- Pixel 5a
- Pixel 6
- Pixel 6 pro
- Pixel 6a
Yeni əməliyyat sistemi ilə birlikdə bəzi dizayn dəyişikləri bizi gözləyir. Belə ki, Google bu versiyada yeni interfeys və divar kağızları ilə bərabər yeni rəng palitralarını da əlavə edib. Həmçinin, yeni interfeys daha cəlbedici animasiyaları özündə birləşdirir. Texniki olaraq Google şirkəti əməliyyat sistemi üzərində bir neçə təkmilləşdirmələr edib. Belə ki, daha rahat işləyən QR skaneri dəstəyi, yenilənmiş mübadilə buferi xüsusiyyətləri kimi yeniliklərə malikdir. Məsələn, kopyaladaığınız mətn və ya kodlar təhlükəsizliyin qorunması üçün uzun müddət yaddaşda saxlanılmayacaq. Əsas yeniliklərdən biri isə Bluetooth LE Audio dəstəyidir ki, naqilsiz qulaqlıqların daha sürətli işləməsinə imkan yaratmalıdır.
Beta versiyası ilə Android 13 əməliyyat sisteminin bir çox xüsusiyyətlərini görmək fürsətimiz olmuşdu. Bununla belə, son versiyanın beta ilə müqayisədə daha sürətli və etibarlı olacağı mübahisəsizdir. Google Android 12 ilə əməliyyat sistemini əhəmiyyətli dərəcədə dəyişmişdi. Android 12-nin çatışmazlıqlarının isə Android 13 ilə tamamladığını deyə bilərik.
