Samsung şirkəti bu gün keçirdiyi Galaxy Unpacked tədbirində yeni nəsil qatlana bilən smartfonlarını təqdim edib. Aydındır ki, söhbət Galaxy Z Fold 4 və Galaxy Z Flip 4 modellərindən gedir. Smartfonlardan ümumən danışsaq hər iki Galaxy Z seriyası modelləri öz sələfi ilə müqayisədə əhəmiyyətli dizayn dəyişikliyinə məruz qalmayıb. Ona görə ilk baxışdan düşünə bilərsiniz ki, smartfonlar ötən il çıxarılmış modellərə nisbətən heç dəyişməyib. Lakin yanıldığınızı mütləq şəkildə qeyd etməliyik.
Çünki, nəhayət Samsung şirkəti istifadəçilərin iradlarını eşidərək ilk olaraq Galaxy Z Fold 3 modelində də mövcud olan xarici ekranın nazik-uzun dizaynından əl çəkir. Nazik-uzun ifadəsinin nə olduğunu bilmirsinizsə, televizor pultlarını nümunə göstərə bilərik. Hansı ki, televizor pultları normal smartfondan uzun və ensiz olur. Galaxy Z Fold 3 seriyasına qədər smartfon qatlanmış olduğu vəziyyətdə dediyimiz bənzətməyə uyğun gəlirdi. Samsung Galaxy Z Fold 4 modeli isə artıq qatlanmış vəziyyətdə normal smartfon ölçülərinə daha yaxındır. Galaxy Z Fold 3 modelindən həm daha kiçik, həm daha yüngüldür. Galaxy Z Fold 4 modelinin timsalında Galaxy Z Flip 4 modelində dəyişikliklər isə nisbətən daha azdır. Ona görə də elə birinci Galaxy Z Flip 4 modeli barədə detalları sizinlə bölüşək.
Samsung Galaxy Z Flip 4 modeli nə vəd edir?
Qeyd edə bilərik ki, Galaxy Z Flip 3 ilə yanaşı gətirsəniz belə Galaxy Z Flip 4 ilə aradakı fərqləri görmək çətin ola bilər. Smartfonun ölçülərində çox xırda dəyişikliklər olub. Təkmilləşdirmələr özünü kompaktlaşdırılmış və dayanıqlılığı artırılan yeni qatlama mexanizmində, Snapdragon 8+ Gen 1 çipsetində göstərib. Yeni qatlama mexanizminin daha yaxşı işlədiyini Galaxy Z Flip 3 modelini əlinizə alıb müqayisə apardıqda hiss edə bilərsiniz.
Smartfon 6.7 düymlük Dynamic AMOLED 2X FHD+ təsvir ölçülü adaptiv 120Hz görüntü yeniləmə tezliyi dəstəkləyən ekran panelinə sahibdir. Xaricdə 1.9 düymlük AMOLED ekran paneli istifadə edilib ki, “260×512 piksel” təsvir ölçüsünə malikdir. Texniki cəhətdən hər iki ekran paneli Galaxy Z Flip 3 ilə fərqli görünmür. Smartfonun daxili ekranı Ultra Thin Glass, xarici ekranı Gorilla Glass Victus+ ilə qorunur.
Kamera parametrlərinə baxdıqda isə axır ki, bir dəyişiklik görə bilirik. Ötən il Galaxy Z Fold 3 modelində quraşdırılmış 12MP F/1.8 baş kamera sensoru Galaxy Z Flip 4 modelinə köçürülüb. Eyni zamanda OIS stabilizatoru ilə gücləndirilib. İkinci sensor isə 12MP F/2.2 123˚ ultra-geniş bucaqlı kameradır. Selfi kamerası isə 10MP olmaqla yüksəliş əldə etməyib.
Ötən il Galaxy Z Flip 3 və Galaxy Z Fold 3 modellərinin ikisində də 12MP təsvir ölçülü kamera mövcud idi. Lakin Galaxy Z Fold 3 modelindəki 12MP kamera sensoru texniki cəhətdən daha güclü idi. Ona görə də indi Z Flip 4 modelində işlədilib.
Snapdragon 8+ Gen 1 çipsetinə malik smartfon 400 mAs daha böyük 3700 mAs həcmli batareya ilə təchiz edilib. 25 Vt sürətli şarj dəstəkləyir. Android 12 üzərinə OneUI 4.1 ilə qutudan çıxır. 75 fərqli rəng kombinasiyası ilə sifariş edilə bilər. Lakin ölkəmizdə bu imkanın əlçatan olacağını düşünmürük. IPX8 sertifikatı üzrə suya qarşı dayanıqlı olsa da diqqətli olmağınız məsləhətdir. Smartfon “stereo” səs ucaldanlarla təchiz edilib. İndi isə keçək Galaxy Z Fold 4 modeli barədə bəhs etməyə. Qiymətlərə sonda nəzər salacağıq.
Samsung Galaxy Z Fold 4 modeli nə vəd edir?
Galaxy Z seriyası ilə bağlı bəzi deyilənlər öz əksini tapmadı. Məsələn, “Z” hərfinin yığışdırılacağı iddiaları atıldı və baş tutmadı. Galaxy Z Fold 4 modelinə fiziki S-Pen yuvasının əlavə ediləcəyi deyildi və həyata keçmədi. Lakin ən azından smartfonun qeyri-erqonomik ölçü problemləri qismən həll edildi. Smartfonun eni onsuzda yaxşı səviyyədə idi. Ona görə də Samsung şirkəti Galaxy Z Fold 4 modelinin uzunluğunu 3.1 mm qısaltdı. Beləliklə, gövdə nisbəti gözlə görüləcək qədər yaxşılaşdı. Yeni Z Fold modelinin gövdəsi bu dəyişiklikdən sonra həm yüngülləşdi, həm də cüzi nazikləşdi.
Smartfonun ölçüsü qısalmaqdan əlavə, xarici ekranın kənar çərçivələri də azaldılıb deyə ekranın səth sahəsindən itkiyə gedilməyib. Yəni daha kompakt ölçülü smartfonun xarici ekranı hələ də 6.2 düymlük 120Hz tezlikli adaptiv görüntü yeniləmə tezliyinə sahib Dynamic AMOLED 2X ekran panelinə sahibdir. Təsvir ölçüsü isə rəqəm kimi baxdıqda cüzi təkmilləşdirilsə də FHD+ olaraq qalır.
Smartfonun daxilindəki 7.6 düymlük qatlanan ekranın da ölçüsü cihazın kiçilməyinə baxmayaraq sabit qalıb. Bunun da səbəbi kənar çərçivələrin azalmasına bağlıdır. Daxildə də 120Hz adaptiv tezlikli Dynamic AMOLED 2X ekran paneli işlədilib. Təsvir ölçüsü isə FHD+ ilə sabitdir. Ekrandakı qırışlar tam yox olubmu sualına cavab isə, heyfislənərək xeyr cavabını verəcəyik. Lakin ümumilikdə əvvəlki nəsillərlə ciddi fərq mövcuddur.
Şablona çevrilsə də, smartfonun qatlama mexanizminin təkmilləşdirildiyini qeyd etməliyik. Ən əsas diqqət çəkən texniki yenilik isə smartfonun daxilinə zərbələri udmaq üçün xüsusi kiçik “yastıqcıq səthlərinin” quraşdırılmasıdır. Nəticədə cihaz qatlanan ekranı üzərində yerə düşsə zərbə gövdə tərəfindən ekranın yerə dəydiyi yerdən udulduğu üçün zərər minimuma endirilir.
Smartfonun kamera konfiqurasiyasına gəldikdə Galaxy S22+ modelindəki ilə eyni kamera konfiqurasiyasına malikdir. Z Fold 3 ilə müqayisə edilməyəcək dərəcədə üstündür. 50MP ISOCELL GN5 əsas sensoru OIS və EIS ilə gücləndirilib. İkinci 10MP sensor isə 3 qat optik yaxınlaşdıra bilən telefoto kamerasıdır. Üçüncüsü və son sensor isə yenə 12MP təsvir ölçülü 123˚ ultra-geniş bucaqlı kameradır. Smartfonun 2 fərqli ekranı üzərinə selfi kameraları yerləşdirilib. Qapaq üzərindəki selfi kamerası 10MP, daxildəki qatlanan ekranın altına yerləşdirilmiş selfi kamerası isə 4MP təsvir ölçüsünə malikdir. Ekran altında yerləşən 4MP kamera həm innovativ, həm gülünc görünsə də o qədər də lazımi deyil. Çünki, arxa kamera selfi kamerası kimi işlədilə bilər.
Snapdragon 8+ Gen 1 çipsetindən güc alan cihaz 4400 mAs batareyaya sahibdir və 25 Vt sürətli şarj dəstəkləyir. Qatlanan smartfonlar üçün xüsusi Android 12L əməliyyat sistemi üzərinə One UI 4.1 ilə qutudan çıxır. Qeyd etməliyik ki, S-Pen üçün proqram təminatı səviyyəsində ciddi dəstək verilsə də fiziki bir yuva mövcud deyil. S-Pen istifadə edəcəksinizsə Galaxy Z Fold 4 örtüyü almaq məcburiyyətindəsiniz. Smartfonlar barədə danışmağı burda dayandıraraq qiymətlərə keçid etmək istərdik.
Smartfonların qiyməti nə qədər olacaq?
Azərbaycanda yaxın həftələrdə və ya günlərdə rəsmi mağazalarda satışda olacaq smartfonların qiyməti hələlik naməlum olaraq qalır. Avropa qiymətlərinə baxdıqda Galaxy Z Flip 4 modelinin 128GB yaddaşa malik variantı 1099 avro, Galaxy Z Fold 4 modelinin 256GB yaddaşa malik variantı 1799 avro qiymətdən başlayır. Nəticə etibarilə smartfonlar nə qədər mükəmməl olsa da qiymətinə görə çoxlarımızın büdcəsinə uyğun olmayacağı dəqiqdir.
