Ötən gün iOS 16 Beta 5 yeniləməsi ilə iPhone X modelində Apple şirkətinin ləğv etdiyi xüsusiyyət geri gəldi. Hansı ki, söhbət batareya faizinin göstərilməsindən gedir. Gülünc də olsa iPhone X ilə bu xüsusiyyətin ləğv edilmə səbəbi, çərtik kimi göstərilirdi. Çərtiyin üst hissədə çox yer tutması bildirişləri göstərməyi çətinləşdirdiyi üçün, əlavə olaraq batareya faizinin də orada yerləşməsinə güya problem yaradırdı. Lakin artıq batareya faizi elə batareya simgəsinin üzərində göstəriləcək. Hələ ki, iOS 16 Beta 5 yükləməyi məsləhət görmürük. Bu xüsusiyyəti işlətmək üçün iPhone 14 seriyası ilə birlikdə iOS 16-nın yekun versiyasının yayımlanmasını gözləməyiniz məsləhətdir. Lakin Apple timsalında Tayvan gərginliyi batareya faizindən daha ciddi problemlər yaradır.
Yaranan siyasi gərginliklər iPhone 14 modelinin istehsal prosesini gecikdirir!
İndi isə, keçək mövzunun əhəmiyyətli tərəfinə. Apple iPhone 14 seriyasının təqdimatının Tayvan və Çin problemlərinə görə gecikə biləcəyi bildirilir. Yeni məlumatlara görə, Çin və Tayvan arasında davam edən siyasi gərginlik səbəbindən Apple iPhone 14 modelinin komponentlərinin tədarükündə ləngimə yarana bilər. Dünyanın ən böyük çip istehsalçılarından biri olan TSMC-nin baş ofisi Tayvanda yerləşir. Apple şirkətinin iPhone modellərinin komponentlərinin istehsalının əsas hissəsi isə Çində yerləşir. Bu o deməkdir ki, iPhone 14 seriyasının tədarükündə problemlər olmaması üçün Çin-Tayvan gərginliyindən bir üsulla yan keçilməlidir.
Apple, Tayvandakı tədarükçülərindən Çinin yeni qaydalarına əməl etmələrini istəyib. Çinin yeni qaydaları, istehsal olunan məhsulların “Taiwan, China” və ya “Chinese Taipai” kimi etiketlənməsini qadağan edir. Çin, Tayvandakı təchizatçıların göndərdiyi komponentləri Pegatron fabrikində saxlamağa başlayıb. Göndərilən materialların, göndəriş sənədlərində Tayvan və ya rəsmi “Çin Respublikasından” bəhs edilib-edilmədiyi yoxlanılması üçün iPhone 14 komponentləri gömrük tərəfindən saxlanılıb. Problemlər həll olunmasa, gömrük məhsulları Tayvana geri qaytara bilər. Bu da iPhone 14 seriyasının gecikməsinə və ya istehsal ədədlərinin azalmasına ciddi səbəb yaradır.
Apple, iPhone 14 təqdimat tədbirini 13 sentyabr tarixində keçirməyi planlaşdırırdı. Hətta bu barədə əksər detalları ötən gün sizinlə bölüşmüşdük. Təqdimata 1 ay qalsa da, Apple bütün bu olanlar barədə açıqlama verməyərək, səssiz qalmağa davam edir. Tayvandakı gərginlik aradan qalxmasa yeni model iPhone modellərinin təqdimatı bir neçə həftə təxirə salına bilər.
Apple şirkətinin, iPhone 14 seriyasının yaşadığı çətinliklər barədə siz nə düşünürsüz? Fikirlərinizi aşağıdan rəylər bölməsində bizimlə bölüşə bilərsiniz.
