Geely şirkətinin yenilənmiş Coolray modeli barədə xatırlayırsınızsa 2 həftə əvvəl məlumat vermişdik. Həmin xəbərin rəylərində isə izləyicilərin ən çox bildirdiyi şey modelin eksteryerindəki dizayn dəyişikliyinin Lexus ilə bənzərlik daşıması idi. Yeni Geely Atlas modeli isə fərqli bir Amerikalı istehsalçının avtomobillərinə inanılmaz dərəcədə bənzəyir. Əgər sizin üçün aydın deyilsə söhbət, məşhur Cadillac brendindən gedir.
Geely şirkətinin təqdim etdiyi avtomobil əslində, bir müddət əvvəl FX11 kod adı ilə ortaya çıxmışdı. Çində isə yeni avtomobil Boyue L olaraq adlandırılıb. Hal-hazırda brendin xarici bazarda satdığı Atlas modelinin Çində Boyue adlandırıldığını nəzərə alsaq, Boyue L modeli qlobal bazardakı yeni Atlas olacaq.
Boyue L və ya digər adı ilə Atlas modeli adındakı “L” uzantısının haqqını verir ki, öz sələfi ilə müqayisədə 12 sm. uzanıb və 7 sm. enlənib. Təkər bazasının uzunluğu isə 10 sm.-dən çox artıb. Bu nəhəng avtomobil Geely Tugella ilə eyni CMA platforması üzərinə inşa edilib. Ona görə krossoverin böyük ölçülərdə olması normaldır.
Avtomobilin eksteryer və interyer dizaynı
Eksteryerin dizaynından danışmağa davam etsək, Cadillac Lyriq modeli ilə uzaqdan qohumluq hiss etdirən dizayn çox futuristik görünüşə malikdir. Ön tərəfdə “V” şəkilli nəhəng radiator barmaqlığının yan və üst hissələri boyunca uzanan və ortada “geely” loqotipi ilə birləşən LED işıqlar diqqət çəkir. Kapotun üzərindəki çıxıntılı işləmələr isə kənarlardan qapılara doğru uzanaraq avtomobilə əzələli görünüş qatır. Arxa tərəfin dizaynı da yenə avtomobilin “nəhəng” olduğu hissini bizə ötürə bilir. Lakin əyləc işıqlarının və kəskin formada çölə doğru çıxıntı yaradan baqaj qapağının dizaynı ən azından şəkillərdə biraz qəribə görünür.
Çox uzatmdan keçək interyer dizaynına. Geely tərəfindən keçirilən tədbirdə yeni atlas (Boyue L) modelinin interyerinə baxmağa icazə verilməyib. Lakin təmin etdiyimiz interyer görüntüləri ilə yenə də aşağıdakı qalareyadan tanış ola bilərsiniz. Avtomobilin cihazlar panelində bir ədəd 13,25 düymlük böyük ekran mövcuddur. Sürücünün qarşısındakı ekran 10,25 isə düymdür və ön panelin içinə doğru basdırılıb. Bütün multimedia sistemi Geely Galaxy Air OS adı verilən əməliyyat sistemi ilə Qualcomm Snapdragon 8155 prosessoru üzərindən işləyir. Şəkillərdə də görə biləcəyiniz kimi hər şey Tesla modellərindəki kimi ekrana inteqrasiya edildiyindən fiziki düymələrin sayı minimum dərəcədə azdır. Avtomobil ikinci səviyyə avtopilota sahibdir.
Geely Atlas modeli 1300 km məsafə qət edə biləcək
Əslində Geely şirkəti tərəfindən təqdim edilə yeni Atlas (Boyue L) modeli şirkətin gələcək strategiyasının ən dolğun formada təmsil edildiyi modeldir. Belə ki, yeni model ağıllı “təhlükəsizlik, interyer, texnologiyalar, idarəetmə və hibrid” prinsiplərini özündə toplayır.
Hamısını bir-bir sadalasaq bura yerləşməz, lakin bəzilərini qeyd edək. Məsələn, GEEA 2.0 dəstəkli Flex Ray Bus neyron şəbəkəsi və 5G dəstəyi ilə aktiv olaraq avtomobil getdiyiniz yola uyğun bütün idarəetmə mexanizmlərini adaptiv tənzimləyə bilər. 100-dən fərqli ssenari üzrə müdaxilə edə məsələn, ən sadəsi döngələrdə yoldan çıxmamaq üçün sürəti avtomatik aşağı sala bilər. Avtomobilin gövdəsi də iddialara görə öz ağırlığının 5 qatı qədər tavan zərbələrinə dayanıqlıdır.
Əsas məsələ isə, belə nəhəng avtomobil üçün yürüyüş məsafəsinin mükəmməl səviyyədə olmasıdır. Boyue L modeli Hi-F və Drive-E adlı iki modifikasiyalarda təqdim edilir. Hi-F hibrid modeli barədə verilən məlumata görə, 100 km məsafəyə sadəcə 4,2 litr yanacaq sərf edəcək və hibrid qurğusu hesabına 1300 km məsafə qət edə biləcək.
Avtomobil 180 at güclü 1.5L mühərriklə 290nm fırlanma anı, 218 at güclü 2.0L olan mühərriklə 325nm fırlanma anı hasil edir. Hər iki benzin mühərriki 7 pilləli DCT transmissiya ilə təchiz edilib. Əlavə olaraq elektromobil variantının da çıxarılacağı deyilir. 50 km/s sürəti 3.5 saniyəyə toplayacaq.
Yeni Geely Atlas modelinin Çindəki qiyməti hələ açıqlanmayıb. Böyük bir ehtimalla Çində Boyue L adı ilə təqdim edilən bu model qlobal bazarda Geely Atlas L 2024 kimi qarşıdakı illərdə anons ediləcək. Yəni hələ ki, biraz gözləməli olacağıq.
